काठमाडौं, ९ बैशाख ।
कोरोना भाइरस(कोभिड १९) को महामारीले मानव जातिमाथि भयानक संकट पैदा गराएको छ । जीवन नै रहने नरहने ठेगान छैन, तर यस्तो महामारीमा पनि गुणस्तरहीन खाद्यान्न राहतका रुपमा बितरण गरी उपमहानगरपालिकाको बजेटमा भ्रष्टाचार गर्नेहरु देखिए । यस्तै लकडाउनका कारण अभावमा परेका जनतालाई राहतमा कुहिएको दाल बितरण गर्ने कलैया उपमहानगरपालिकाका प्रमुख राजेश राय यादवलाई प्रहरीले आज पक्राउ गरेको छ ।
कुहिएको दाल राहतमा बितरण गर्ने मेयर यादवले प्रहरी प्रशासनबाट जोगिन धेरै प्रयास गरे पनि अन्ततः उनी आज पक्राउ परेका छन् । उनी काङ्ग्रेसका केन्दीय सदस्य तथा संविधानसभा सदस्य राधेचन्द्र यादवका छोरा हुन् । उनी यादव कोल्डस्टोर संचालन गर्दागर्दै बाबुको कृपाले कांग्रेसको जिल्ला सदस्य भए । र, लगत्तै मेयरको टिकट पाएर जितेका हुन् । तर राहतमा कुहिएको दाल समेत बितरण गरी जनस्वास्थ्यमा गम्भीर खेलवाड गरेपछि उनी हिरासतमा पुगेका छन् ।
नेपालफेस डटकमले कलैया उपमहानगरपालिकाका मेयर राजेश राय यादवले आफ्नै कोल्डस्टोरको गुणस्तरहीन दाल किनेर ८ वटा वडामा राहतका रुपमा बितरण गरेको समाचार सबैभन्दा पहिले उजागर गरेको थियो । चैत २८ मा नेपालफेसले ‘महामारीमा मेयरको कमाउधन्दाः सडेको दाल र आलुको मूल्य दोब्बर’ शीर्षकमा समाचार प्रकाशित गरेको थियो । प्रहरीले चैत २९ मा यादव कोल्डस्टोरबाट ३ सय ८० बोरा गुणस्तरहीन दाल बरामद गर्यो । जुन दाल खाद्य प्रविधि तथा गुण नियन्त्रण कार्यालय हेटौंडामा परीक्षण गर्दा खान अयोग्य ठहरियो ।
मेयर यादवको यादव कोल्डस्टोर रंगपुरमा श्री धनलक्ष्मी दाल मिलका संचालक तेजकरण शर्माले ५८ हजार किलो दाल राखेका थिए । तर शर्मालाई सोध्दै नसोधी मेयर यादवले प्रतिकिलो १ सय २० रुपैयाँमा उक्त दाल उपमहानगरबाट किनेर वडा वडामा बितरण गर्न लगाएका थिए । तेजकरण शर्माले उक्त दाल पशुआहाराका लागि राखिएको र आफूलाई बिक्री गरेकोबारेमा केही थाहा नभएको बिज्ञप्ति निकालेका थिए । तर उनलाई पनि प्रहरीले आइतबार पक्राउ गरेको छ ।
आइतबाट प्रहरीले कलैया–१ का वडाध्यक्ष हरिओम साह सोनार, वडा नं. ७ का अध्यक्ष सर्फुल्लाह अन्सारी, कलैया–२० का वडा सचिव खेदु मियाँसँगै कलैया–७ स्थित यादव आइस एन्ड कोल्डस्टोरका कर्मचारी कृष्णप्रसाद यादवलाई पक्राउ गरेको थियो ।
मेयर यादवले भाइलाई जोगाउन कर्मचारी कृष्ण यादवलाई प्रहरीकोमा पठाएका थिए । तर उक्त कोल्डस्टोर मेयरकै भएको सबैलाई थाहा भएकाले उनले उन्मुक्ति पाउने अवस्था थिएन । प्रहरी प्रशासनले सोमबार बेलुका पनि यादव कोल्डस्टोरबाट ४ सय ५० बोरा ५० किलो गुणस्तरहीन दाल बरामद गरेको थियो । जुन दाल चैत २९ मा बरामद गरेको भन्दा पनि बढी कुहिएको रहेकाले प्रहरीले मंगलबार मेयर यादवलाई पक्राउ गरेको छ । सोमबार बरामद दाल पनि गुणस्तर परीक्षणका लागि हेटौंडा पठाइएको छ ।
बसतपुर प्रहरी चौकीमा पनि यादव कोल्डस्टोरबाट राहत बाँड्न लगिएको १४ बोरा दाल यसअघि नै प्रहरीले बरामद गरिसकेको छ ।
यो पनि पढ्नुहोस्ः
