परराष्ट्रमन्त्री ज्ञवालीकाे भारत भ्रमणकाे मिति टुंगाे लाग्याे

काठमाडाैं । परराष्ट्रमन्त्री प्रदीपकुमार ज्ञवालीले गर्ने भनिएकाे भारत भ्रमणकाे मिति टुंगाे लागेकाे छ ।  मन्त्री ज्ञवालीले नेपाल–भारत परराष्ट्र मन्त्रीस्तरीय संयुक्त आयोगको छैटौं बैठकका लागि आगामी माघ १ गते भारत भ्रमण गर्ने पक्का भएकाे हाे ।

स्रोतका अनुसार सोही दिन साँझ आयोगको बैठक बस्ने छ । साथै भोलिपल्ट केही राजनीतिक भेटघाट गरेर ज्ञवाली स्वदेश फर्कने कार्यक्रम तय गरिएकाे छ । बैठकको मितिका बारेमा औपचारिक घोषणा हुन भने बाँकी छ ।

यसअघि आयोगको बैठकका लागि नेपालतर्फबाट मंसिरको दोस्रो वा अन्तिम साता प्रस्ताव गरिएको थियो । तर, नेपालले प्रस्ताव गरे पनि भारतले अन्तिम सहमति जनाएको थिएन । यसबीच नेपालमा विकसित राजनीतिक घटनाक्रमका कारण पनि भ्रमण अन्योलमा परेकाे थियाे ।