रोगविरुद्ध सचेतनाका लागि विद्यालय शान्तिदूत कार्यान्वयनमा आउँदैछ : स्वास्थ्यमन्त्री पौडेल

बुटवल । स्वास्थ्य तथा जनसंख्या मन्त्री प्रदीप पौडेलले बुटवल कालिका बहुमुखी क्याम्पसले विद्यार्थीको अनलाइन पढाइका लागि निर्माण गरेको डिजिटल स्टुडियोको उद्घाटन गरेका छन् ।

नेपालमै सरकारी क्याम्पसहरुमध्येमा अनलाइन पठनपाठनका लागि पहिलो दावी गरिएको स्टुडियोका माध्यमबाट भौतिक कक्षामा उपस्थित हुन नसक्नेलाई अनलाइनमार्फत भिडियो कक्षामा सहभागी गराइने क्याम्पसले जनाएको छ ।

स्टुडियोको उद्घाटन गर्दै मन्त्री पौडेलले आफू नेतृत्वमा आए पछि संघीय अस्पतालहरुको सेवामा सुधार आएको र नागरिकका जटिल रोगको उपचार सेवा विस्तार तथा सुधार भैरहेको बताए । ‘हामीले स्वास्थ्य सेवा सुधारमा इमान्दार प्रयास गरिरहेका छौं । र पहिले भन्दा केही परिवर्तन भएको पनि छ,’ मन्त्री पौडेलले भने, ‘रोग लाग्न नदिन निरोधात्मक विधिसमेत प्रवद्र्धन गरिरहेका छौं ।’

मन्त्री पौडेलले विद्यालयहरुमा विद्यालय स्वास्थ्य दूत नियुक्त गरेर बालबालिकाहरुमार्फत स्वास्थ्यसम्बन्धी सचेतना समुदायस्तरसम्म पुर्याउने कार्य प्रारम्भ भएको बताए । ‘हाम्रा विद्यालयहरुमा स्वास्थ्य शिक्षा अनिवार्य र पाठ्यक्रम सुधारका लागि शिक्षा मन्त्रालयसँगसमेत सहकार्य गरिरहेका छौं,’ मन्त्री पौडेलले भने, ‘विद्यालय शिक्षाका माध्यमबाट नागरिकमा स्वस्थ जीवनशैलीका प्रभावकारी विधि प्रवद्र्धन गरेर नागरिकलाई स्वस्थ बनाउने हाम्रो प्रयास रहनेछ ।’

मन्त्री पौडेलले नागरिकका स्वास्थ्य उपचारसम्बन्धी विवरण पटक पटक जाँच गर्नु नपर्ने गरी एउटै प्रणालीमा आउने र राज्यले नागरिकको स्वास्थ्यबारे प्रभावकारी तथ्यांक पाउने गरी विद्युतीय चिकित्सा व्यवस्थापन प्रणाली कार्यान्वयनको चरणमा गएकाले यसले स्वास्थ्य सेवामा अर्को योगदान दिने विश्वास व्यक्त गरे ।

क्याम्पस प्रमुख घनश्याम पाठकले डिजिटल प्रविधिबाट कक्षा आउन नसक्नेलाईसमेत ध्यानमा राखेर थालिएको भिडियो अनलाइन कक्षा सरकारी क्याम्पसहरुमा पहिलो भएको दावी गरे ।