नेकपा विभाजन भयो भने लोकतन्त्रमा ग्रहण लाग्नसक्छः मन्त्री त्रिपाठी 

काठमाडौं । संघीय मामिला तथा सामान्य प्रशासन मन्त्री हदृयेश त्रिपाठीले गणतन्त्र र लोकतन्त्रको सौन्दर्यताको सदुपयोग गरेर नै विभिन्न प्रकारका समूहहरु सडकमा देखिएको बताउनुभएको छ । हिजोको निरंकुश राजसंस्थाको शासनकालमा यसरी सडकमा लोकतन्त्र माग्न पाइँदैनथ्यो, आज लोकतान्त्रिक अधिकार प्रयोग गरी राजतन्त्रको पक्षमा नारा लाउन पाएका छन् । लोकतन्त्रले नै यो सबै अधिकार पाइएको हो भन्ने कुरा सबैले मनन गर्नुपर्छ, मन्त्री त्रिपाठीले भन्नुभयो–संघीयता र गणतन्त्रको विकल्प नरहेको साथै राजतन्त्रले हरेक स्वतन्त्र अधिकार संकुचित गर्ने कुरा जनताले हिजोको इतिहासबाट बुझेका स्मरण गराउनुभएको छ ।

‘राजतन्त्र केन्द्रीयताको पक्षमा हुन्छ र संघीयता अनि लोकतन्त्रको विपक्षमा रहन्छ । यो कुरालाई बुझ्न हामीले २०४७ सालको संविधानको अन्त्यमा गरिएको प्रजातन्त्र र लोकतन्त्रमाथिको प्रहार नै स्पष्ट छ’ एक टेलिभिजनलाई दिएको अन्तर्वार्तामा त्रिपाठीले भन्नुभयो, कसैले धर्मलाई राजनीतिको सहारा बनाउँछ भने यो धर्मको दुरुपयोग, धर्ममाथिको अन्याय हो , धार्मिक आचरण विरुद्ध काम हो । यो कुरा आम नेपाली जनताले बुझिसकेका छन्,संविधान जारी भइसकेपछि मूलतः वैचारिक संघर्ष मौन छ र वर्तमान अवस्थामा कोरोना भाइरसको प्रभावले व्यक्ति, समाज, देश र जगत नै असुरक्षित छन् । जनतामा कमजोर मनोविज्ञान भएको बेला धर्म र यस्ता विषयमा राजनीति गर्नु गैरजिम्मेवार राजनीति हो ।

हाल सत्ताधारी दल नेकपाभित्र देखिको राजनैतिक अन्तरविरोधलाई मन्त्री हृदयेश त्रिपाठीले गम्भीर रुपमा लिनुभएको छ । उहाँले भन्नुभयो, असन्तुष्टि हुनु बेठिक नभएको, असन्तुष्टि नै परिवर्तन का मुख्य कारण जसलाई हामी सकारात्मक लिन सक्नुपर्छ तर मैले मुख्य समस्या र चुनौती के देखेको छु भने जनताबाट निर्वाचित दलभित्र देखिएको आन्तरिक कलह गम्भीर छ । जस्तै तत्कालीन नेपाली कांग्रेसभित्र देखिएको आन्तरिक कलह कारणले २०४८  सालपछि देश मध्यावधिमा गयो जसका कारणले पछि त्यो प्रणाली पनि गयो र संविधान पनि रहेन ।  त्यसकारणले अहिले देखिएको नेकपाभित्र विवादले यो जोखिम पनि सिर्जना गरेको छ । हाल नेकपा मतदाता र कार्यकर्ता र धेरै जनताभित्र निराशा देखिएको छ र यहीबेला केही शक्तिहरुले यो व्यवस्था विरुद्धको लागेको देखिन्छ । यदि नेकपा विभाजन भयो भने यो प्रणालीमा  नै ग्रहण लाग्न सक्छ र यो व्यवस्था पनि जान सक्छ किनकि संविधानलाई बोक्ने मुख्य सामाजिक राजनीतिक शक्तिहरु कमजोर भए भने संविधानको मर्मरभाव  खण्डित हुन्छ र यसको संरक्षण र कार्यान्वयनमा चुनौती देखिन्छ ।

त्रिपाठीले जनताले लडेर ल्याएको लोकतन्त्र र संघीयतासहितको अधिकार पुन फर्काएर आफूलाई दास नबनाउने पनि दावी गर्नुभयो । नेपाली राजनीतिमा सार्वभौम सत्ता र राजकीयसत्ता कसमा रहने भन्ने पुरानै बहस रहेको र ठूलो संघर्षबाट हिजो जनताले नै राष्ट्रसंस्थाबाट जनतामा ल्याएको राज्यसत्ता र सार्वभौमसत्ताको स्रोत र अधिकार जनताले नगुमाउने बताउनुभयो । लोकतन्त्रको विकल्प हुननसक्ने र अहिले जनतामा रहेको कमजोर मनोविज्ञानमाथि संबिधान, राज्यव्यवस्था र धर्मका नाममा राजनीति गर्न खोज्नु गैरजिम्मेवार राजनीतिको रुपमा मन्त्री त्रिपाठीले टिप्पणी गर्नुभएको छ ।