कांग्रेस पदाधिकारी बैठक : शिक्षक हत्याको चर्काे विरोध, कडा कारबाही गर्न माग

काठमाडौं । प्रमुख प्रतिपक्षी दल नेपाली कांग्रेसको पदाधिकारी बैठकले मंसिर २९ गते सरकारविरुद्ध देशभर व्यापक रूपमा विरोध प्रदर्शन गर्ने निर्णय गरेकाे छ ।

कांग्रेस सभापति शेरबहादुर देउवा निवास बूढानीलकण्ठमा बसेको बैठकले  २९ गते हुने विरोध प्रदर्शनमा सहभागिता जनाउन आफ्ना कार्यकर्तालाई आह्वानसमेत गरेको छ ।

यस्तै बैठकमा मोरङमा बर्बर ढंगले गरिएको शिक्षक हत्याको विरोध गरिएको छ । दोषीलाई कडा कार्वाही गर्न माग गरिएको बैठकपछि प्रवक्ता विश्वप्रकाश शर्माले जानकारी दिएका छन् ।

बैठकपछि प्रवक्ता विश्वप्रकाश शर्माले भनेका छन्, ‘व्यक्ति हत्या २०२७/०२८ सालमा एउटा कम्युनिस्ट पार्टीले गरेको होस् वा ०५७/०५८ तिर अर्को कम्युनिस्ट पार्टीले गरेको होस् वा अहिले अर्को कम्युनिस्ट पार्टीले गर्ने प्रयास गरेको छ ।

व्यक्ति हत्याको राजनीति हिजो पनि गलत छ, आज पनि गलत छ । घटनामा संलग्नलाई कडा कारबाही गर्नुपर्छ ।’ साथै हिंसात्मक राजनीति छाडेर शान्तिपूर्ण बाटोमा आउन समेत कांग्रेसले अपिल गरेका छन् ।