मैले ५ अर्ब खायो भन्ने हल्ला चलाएका छन् : केपी ओली

काठमाडौं । नेकपा (एमाले)का अध्यक्ष केपी शर्मा ओलीले बजेटबारे फेरि असन्तुष्टि व्यक्त गरेका छन् ।

शनिबार बसेको संसदीय दलको बैठकमा सम्बोधन गर्दै ओलीले उनले बजेटबारे असन्तुष्टि जनाउदै बजेटबारे अलिक खुला छलफल गर्न सांसदहरुलाई निर्देशन दिएका हुन् ।

उनले भने,‘यो बजेटमा एक-दुई जनाको मुख हेरेर, अनि हामी सरकारमा छौं भन्दैमा अनि गरिबतिर देश गएपनि के भयो र ? हामी सरकारमा छँदैछौं भनेर हुन्छ ? त्यही चिज हुँदैन भने अनि सन्तोष कसरी मान्ने ? हामीले नै चलाइरहेको मन्त्रालयको कस्तो छ स्थिति ? त्यसमा कस्तो छ बजेटको विनियोजन ? त्यो पनि अलिकति हेर्नुपर्ने हुन्छ ।’

उनले आफूहरु स्वार्थको थैलो भर्नको लागि सत्तामा नभएको पनि जिकिर गरे । उनले अर्को प्रसंगमा प्रतिक्रियावादीहरुले पार्टीको बारेमा नयाँ नयाँ हमला गरेको र अकल्पनीय कुरा सिर्जना गरेको आरोप लगाए । उनले भने,‘आज विहानमात्रै मैले एउटा मिडियामा देखेको थिएँ, केपी ओलीले ५ अर्ब खाईसक्यो, निलिसक्यो कि मुखमा मात्रै हाल्या छ कि ? तर, ५ अर्ब केपी ओलीले खायो, खाने भयो भनेर ।’

ओलीले भ्रमको जालो फिजाएर एमालेप्रतिको विश्वास कसरी हटाउन सकिन्छ भनेर एकथरी लागिरहेको बताए ।

बिचौलिया दीपक भट्टको स्वार्थमा नेपाल धितोपत्र बोर्डको अध्यक्षमा सन्तोषनारायण श्रेष्ठलाई नियुक्ति गर्न ओलीले प्रधाननमन्त्री पुष्पकमल दहाल प्रचण्डलाई दबाब दिएको बिषयमा आएका समाचार आएपछि उनी आक्रोशित भएका हुन् । श्रेष्ठ दीपक भट्टका ब्मापारिक साझेदार हुन् । उनलाई धितोपत्र बोर्डको अध्यक्ष नियुक्ति गरी भट्ट स्टक एक्सचेन्जको अनुमति लिने दाउमा छन् ।

ओलीले धितोपत्र बोर्डको अध्यक्षमा श्रेष्ठलाई नियुक्ति नगरे बजेट नै पास नगर्ने धम्की दिएका समाचार समेत आएका छन् ।