सहकारी ठगीबारे संसदीय छानबिन समिति बनाउन प्रधानमन्त्री सहमत हुनुहुन्छः रमेश लेखक

काठमाडौं । प्रधानमन्त्री पुष्पकमल दाहाल प्रचण्ड सहकारी ठगीसम्बन्धी संसदीय छानबिन समिति गठन गर्न सहमत भएका छन् । प्रमुख प्रतिपक्ष नेपाली कांग्रेसका नेताहरुले प्रधानमन्त्री प्रचण्ड समिति बनाउन सहमत भएको बताएका छन् । प्रधानमन्त्री निवास बालुवाटारमा प्रचण्ड र कांग्रेस नेताहरुबीच शनिबार बिहान संसदको गतिरोध हटाउनेबारे छलफल भएको थियो ।

बैठकमा सहकारी ठगी प्रकरणमा संसदीय छानबिन समिति गठन गरेर निकास दिन प्रधानमन्त्री सहमत भएको कांग्रेस प्रमुख सचेतक रमेश लेखकले जानकारी दिएका छन् । यस विषयमा फेरि थप छलफल गर्ने कुराकारी भएको उनले जानकारी दिएका छन् ।

लेखकका अनुसार प्रधानमन्त्री प्रचण्ड छानबिन समिति बनाउनका लागि सकारात्मक हुनुहुन्छ । राजनीतिक गतिरोध चाँडै अन्त्य होस् भन्ने उहाँको चाहना रहेको छ ।

गृहमन्त्री रवि लामिछानेमाथि सहकारी ठगीको आरोप लागेकाले संसदीय छानबिनको माग राख्दै कांग्रेसले लगातार सदन अवरुद्ध गर्दैआएको छ । जसका कारण नीति तथा कार्यक्रममाथि छलफल अगाडि बढ्न सकेको छैन ।