विवादित डीआईजी चन्दलाई गण्डकी प्रदेशको कमाण्डर बनाउने तयारी

काठमाडौं । त्रिभुवन अन्तर्राष्ट्रिय विमानस्थलको डीआईजी हुँदा भिजिट भिसा प्रकरणमा विवादमा परेका डीआईजी अर्जुन चन्द ठकुरीलाई गृहमन्त्री रवि लामिछानेले गण्डकी प्रदेश प्रहरी प्रमुखको जिम्मेवारी दिन लागेका छन् । कमजोर कमाण्डका कारण चन्द बारम्बार विवादमा आइरहने प्रहरी अधिकृतमा पर्दछन् ।

डीआईजी बिकासराज खनाल बैशाख ६ गते ५६ बर्षे उमेरहदले अवकाश भएपछि गण्डकी प्रदेशको प्रहरी प्रमुख पद रिक्त छ । रिक्त पदमा चन्द जस्ता कमाण्ड कन्ट्रोलमा असफल डीआईजीलाई पठाउन लागिएको छ ।

त्रिभुवन अन्तर्राष्ट्रिय बिमानस्थलको डीआईजी हुँदा भिजिट भिसामा अध्यागमनका कर्मचारीसँग भाग खोजेपछि उनी विवादमा परेका थिए । बिमानस्थलमा कार्यरत हुँदा समन्वय अभाव देखिएपछि उनी विवादमा परेका थिए । भिजिट भिसामा भाग खोज्दा नपाएपछि अध्यागमनका कर्मचारीलाई प्रहरीले कुटपिट गरेपछि डीआईजी चन्द विवादमा परेका थिए । उनले गएको माघ १९ मा राजीनामा नै दिए पनि अस्वीकृत भएको थियो । अहिले तिनै चन्दलाई गृहमन्त्री लामिछानेले गण्डकी प्रदेशको कमाण्डरमा पठाउन लागेका हुन् ।

२०५२ सालमा प्रहरी निरीक्षकमा भर्ना भएदेखि नै उनी कमजोर कमाण्ड क्षमताका कारण विवादमा पर्दैआएका छन् । डीएसपी हुँदा संचार उद्यमी जमिम शाह हत्यामा संलग्न भारतीय अपराधीसँग उनको सम्बन्ध देखिएको थियो । उनीसँगै गणेश चन्द, सुरेन्द्र सिंह लगायत प्रहरीसँग हत्याका योजनाकार भारतीयको कनेक्सन देखिएको थियो ।

पूर्वडिएसपी जगदीश चन्द त गिरोहमै सामेल भएको पुष्टि भएपछि कारबाहीमा परे । त्यो घटनामा अर्जुन चन्दमाथि छानबिन भयो तर त्यसबेला प्रहरी नेतृत्वमा भेगीय हिसाबले उनकै भूगोलका भएकाले उनले उन्मुक्ति पाएका थिए । एसपी भएपछि चन्द कैलालीमा बसे । त्यहाँ पनि बारम्बार विवादमा परेका थिए ।

डीआईजीमा बढुवा भएपछि विमानस्थलमा खटिएका उनी सुरुदेखि नै कमजोर देखिएका थिए । विमानस्थलमा अन्य निकायसँग समन्वय कमजोर देखिएको थियो । भिजिट भिसामा अध्यागमनका कर्मचारीसँग भाग खोजेपछि द्वन्द्व बढेर कुटपिटसम्म हुन पुगेको थियो ।

उक्त कुटपिट प्रकरणमा प्रहरीलाई दोषी देखाएर असई प्रकाश चौधरी निलम्बनमा परे । घटनाको दिन डिआइजी चन्द विदामा भए पनि छानबिन समितिले डिआइजीको समेत कमजोरी औंल्याएको थियो । विमानस्थलमा हुँदा उनी एयरलाइन्स कम्पनीसँग निःशुल्क टिकट मागेको घटनामा पनि विवादमा आए ।