बालुवाटारमा नेकपा सचिवालय बैठक जारी, दुर्घटना टरेकै हो ?

काठमाडौं । प्रधानमन्त्रीको सरकारी निवास बालुवाटारमा नेकपाको सचिवालय बैठक जारी छ । नेकपाको सचिवालयका ५ सदस्यले आव १ बजेका लागि सचिवालय बैठक राखेका थिए ।

प्रधानमन्त्री केपी शर्मा ओलीले अर्का अध्यक्ष पुष्पकमल दाहाल ‘प्रचण्ड’को राजनीतिक प्रतिवेदन फिर्ता नभएसम्म सचिवालय बैठकमा भाग नलिने अडान राखिरहेका थिए । तर राष्ट्रपति विद्यादेवी भण्डारीसँगको भेटपछि प्रधानमन्त्री केपी शर्मा ओली नेकपाको सचिवालय बैठकमा सहभागी भएका छन् । उनले सचिवालय बैठक राखिएकै समय आज दिउँसो १ बजे मन्त्रिपरिषद बैठक राखेका थिए । तर राष्ट्रपतिसँगको भेटपछि उनी सचिवालय बैठकमा सहभागी भएका छन् । ओलीको पक्षमा रहेका भनिएका सचिवालय सदस्य तथा गृहमन्त्री रामबहादुर थापा ‘बादल’ ले पनि उनलाई साथ नदिने भएपछि ओली गलेका छन् ।

बालुवाटारको सचिवालय बैठकका लागि अध्यक्ष पुष्पकमल दाहाल प्रचण्ड बैठकका लागि १५ मिनेट अगाडि नै बालुवाटार पुगेका थिए । सचिवालयका अन्य सदस्य पनि तोकिएको समय १ बजे नै पुगेका थिए । प्रधानमन्त्री ओलीको सचिवालय बैठकमा सहभागितापछि नेकपाभित्रको संभावित दुर्घटता टरेको अनुमान गरिएको छ ।