विवाद समाधानका लागि छलफल गर्न विष्णु पौडेल खुमलटारमा

काठमाडौं । नेपाल कम्युनिष्ट पार्टी (नेकपा) का महासचिव तथा अर्थमन्त्री आज खुमलटार पुगेका छन् । नेकपाका कार्यकारी अध्यक्ष पुष्पकमल दाहाल प्रचण्डलाई भेट्नका लागि उनी गएका हुन् । प्रधानमन्त्री समेत रहेका नेकपा अध्यक्ष केपी शर्मा ओलीको सन्देश लिएर उनी गएका उनी फर्किइसकेका छन् ।

पछिल्लो समय नेकपामा बढिरहेको विवाद उग्र रुप लिएको छ । विशेषगरी ओली समूहको पेल्दै अघि बढ्ने नीति र प्रचण्ड-माधव नेपाल समूहको बहुमतको घेराबन्दीमा पार्ने रणनीतिका कारण विवाद बढेको बुझिएको छ । 

सचिवालय बैठकमा प्रम ओली र अध्यक्ष प्रचण्डको प्रस्तावपछि विवाद झन् बढेको हो । १९ पृष्ठ लामो सो प्रस्ताव फिर्ता भएपछि मात्रै मंसिर ३ गते निर्धारित पार्टी केन्द्रीय सचिवालय बैठक बस्ने ओली समूहको अडान छ ।

तर ओली इतर समूह भने त्यो प्रचण्ड एक्लैको प्रस्ताव नभइ सामूहिक प्रस्ताव रहेको बताइरहेका छन् । 

आजको पौडेल-प्रचण्ड भेटमा पनि यही विषयमा कुराकानी भएको बताइएको छ। 

पछिल्लो समय प्रम ओलीले वामदेव गौतम र माधव नेपाललाई आफ्नो समूहमा ल्याउनका लागि आग्रह गरेपनि दुबै नेताले ओलीलाई कार्यशैली सच्याएर अघि बढ्न सुझाव दिएका छन् । 

बुधबार तोकिएको बैठक अघि पौडेल खुमलटार अर्थपूर्ण रुपमा हेरिएपनि विवाद समाधान सम्भावना अझै पर रहेको खुमलटार स्रोतले बताएको छ ।