बिनोद चौधरीले हडपेको बाँसबारीको १० रोपनी जग्गा सरकारको नाममा

काठमाडौं । विनोद चौधरीले अतिक्रमण गरेको बाँसबारी छाला जुत्ता कारखाना(हाल गंगालाल हृदयरोग केन्द्र)को जग्गा सरकारका नाममा ल्याइएको छ ।

भूमिसुधार तथा मालपोत कार्यालय डिल्लीबजारबाट चाँदबाग रेसिडेन्सीको नाममा रहेको १० रोपनी जग्गा नेपाल सरकारको नाममा ल्याउने निर्णय गरेको हो । बाँसबारी जुत्ता कारखानाको अतिक्रमण भएको १० रोपनी जग्गा सरकारको नाममा ल्याउने निर्णय भएको भूमि सुधार तथा मालपोत कार्यालय डिल्लीबजारका प्रमुख छविराम नेपालीले जानकारी दिएका छन् ।

उपप्रधान तथा गृहमन्त्री रवि लामिछानेले बाँसबारी छाला जुत्ता कारखानाको उक्त जग्गा सरकारको नाममा फिर्ता ल्याउन केही दिनअघि निर्देशन दिएका थिए ।

केन्द्रीय अनुसन्धान ब्यूरो(सीआईबी) को सहयोगमा उक्त जग्गा सरकारका नाममा ल्याइएको जानकारी दिइएको छ ।

बाँसबारी छाला जुत्ता कारखानाको जग्गा अतिक्रमण गरेकोमा नेपाल प्रहरीको सीआईबीले व्यवसायी अरूण चौधरी, तत्कालीन बाँसबारी छाला जुत्ता कारखानाका कार्यकारी अध्यक्ष अजितनारायणसिंह थापा र सञ्जय ठाकुरलाई माघ १८ गते पक्राउ गरेको थियो । थापाले नै उक्त जग्गा चौधरीलाई जुत्ता उद्योग संचालनका लागि दिएका थिए । सोही प्रकरणमा सीआइबीले बिहीबार सांसद विनोद चौधरीसँग पनि बयान लिएको थियो ।

यद्यपि चौधरी ग्रुपले भने बाँसबारीको उक्त १० रोपनी जग्गा ऐन कानुन अनुरुप नै आफूले प्राप्त गरेको दाबी गर्दै सर्वोच्च अदालतमा मुद्दा दर्ता गरेको छ ।