ओलीले गुजारे सचिवालय बैठक बोलाउन दिइएको समय, अब के हुन्छ ?

काठमाडौं । नेपाल कम्युनिष्ट पार्टी (नेकपा) को केन्द्रीय सचिवालय बैठक बोलाउन दिइएको म्याद आज सकिँदै छ । दुई दिनको समय दिएर बहुमत सदस्यले दिएको लिखित म्यादको अवधिलाई पार्टी अध्यक्ष तथा प्रधानमन्त्री केपी शर्मा ओलीले गुजारिदिएका छन् । 

सचिवालय बैठक बोलाउने सामान्य मागमा समेत असहिष्णु बनेको भन्दै ओलीसँग नेकपाका बहुमत सदस्य आक्रोशित बनिरहेका छन् । आक्रोशित सदस्यहरुले ओलीको इगोको कारण विवाद बढेको आरोप समेत लगाइरहेका छन् । नेकपाका कार्यकारी अध्यक्ष पुष्पकमल दाहाल प्रचण्ड, माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठले सामूहिकरुपमा दुईदिनअघि लिखित माग गरेका थिए ।

प्रधानमन्त्री निवास बालुवाटार पुगेर उनीहरुले बैठकको माग गर्दै लिखित पत्र बुझाएका थिए । तर ओलीले आफ्नो सहमतिबिना कुनै पनि बैठक राखे पार्टी विभाजनको अवस्थामा पुग्न सक्ने चेतावनी दिएका थिए ।

सचिवालय बैठक बोलाउनुको साटो ओली भने सचिवालयका सदस्यहरुलाई आफ्नो पक्षमा पार्नको लागि प्रयास गरिरहेको बुझिएको छ । केहीदिन अघि धुम्बाराहीमा सचिवालयको अनौपचारिक बैठक बसेसँगै अर्थमन्त्री तथा महासचिव विष्णु पौडेलले उपाध्यक्ष वामदेव गौतमका घरमा पुगेका थिए । यसअघि वामदेवले नै प्रचण्ड समूहलाई साथ नदिएपछि ओलीको राजीनामा मागको विषयमा सो समूह लचक बनेको थियो । 

यस्तै आइतबार प्रम ओलीले माधव नेपालसहित चार नेतालाई बालुवाटारमा बोलाइ ३ घण्टासम्म कुराकानी गर्दै फकाउने प्रयास गरेका थिए । तर प्रम ओलीबाट यसअघि पटकपटक धोका पाएको भन्दै दुबै नेताले अन्य प्रस्तावमा कुरा गर्नु भन्दा सचिवालय बैठक बोलाउनेमै जोड दिएको बताइएको छ ।

अब के हुन्छ?

पार्टीका सबै विवादलाई सचिवालयमा छलफल गरौं भन्ने प्रचण्डको प्रस्ताव ओलीले नमानेका कारण लिखित माग गरिएको सो समूहले जनाएका छन्। तर दुई दिनको म्याद आज सकिँदै छ । 

आजका लागि सचिवालय बैठक बोलाउने कुनै तयारी नभएको बालुवाटार स्रोतले बताएको छ । 

अब प्रचण्ड समूहले वैकल्पिक बाटो अपनाउने आँकलन गरिएको छ । यसअघि प्रचण्डलाई कार्यकारी अधिकार दिइएकोले उनले नै एकल निर्णयबाट सचिवालय बैठक बोलाउन सक्ने अवस्था छ । सो बैठकमा गणपूरक संख्या पूरा भएमा सो बैठकको निर्णयले वैधानिकता समेत पाउनेछ । 

तर प्रचण्ड समूह भने तत्कालै कडा कदम लिने पक्षमा नरहेको खुमलटार निकट एक नेकपा नेताले बताए। केही दिन ‘पर्ख र हेर’ को नीति लिने र केही दिनमा ओली विरुद्ध कडा रुपमा प्रस्तुत हुने तयारी रहेको समेत ती नेताले दावी गरेका छन् ।