पाैडेल पक्षको चित्त बुझाउन कांग्रेस शीर्ष नेताकाे बैठक बस्दै

काठमाडौं । नेपाली कांग्रेसका शीर्ष नेताहरूको बैठक आज बस्ने भएको छ । आज दिउँसो १ बजे सभापति शेरबहादुर देउवाको निवास बुढानिलण्ठमा बस्ने भएको हो । 

संस्थापन समूह र वरिष्ठ नेता रामचन्द्र पौडेल पक्षबीच सहमति जुट्न नसकेपछि शीर्ष नेताहरुको छलफल लम्बिएको हो। केन्द्रीय समिति बैठक अघि नै सहमति गरेर जानको लागि कांग्रेसको बैठक बस्दै आएको हो। 

नेता पौडेलसहित २७ जना केन्द्रीय सदस्यले सभापति शेरबहादुर देउवालाई बुझाएको असहमतिपत्रमाथि लगातार छलफल भएपनि सहमति जुटेको छैन।

सहमतिका लागि भन्दै गत शुक्रबारका लागि तय गरिएको  पार्टीको केन्द्रिय कार्यसमिति बैठक पनि भोलिसम्मका लागि सारिएको छ। पौडेलसहितका नेताले सभापतिले एकलौटी ढंगले विभाग बिस्तार गरेको, विधान मिचेको, महाधिवेशन टार्न खोजेको लगायतको आरोप लगाएका छन्। 

एकलौटी रुपमा गठन गरेको विभाग खारेज हुनुपर्ने पौडेल समूहको माग छ। तर देउवाले विभाग गठन फिर्ता नहुने र अन्य विषयमा छलफल गर्न आफू तयार रहेको बैठकमा जवाफ दिइसकेकाले सहमति जुट्ने प्रयास न्युन रहेपनि छलफल भने चलिरहेको छ।