केन्द्रीय समिति बैठकका अघि कांग्रेस शीर्ष नेताको बैठक बस्दै

पार्टीका सांसद तथा आमन्त्रित केन्द्रीय सदस्य सूर्यबहादुर केसीको निधन भएपछि मंगलबारलाई स्थगित भएको बैठक आज बस्न लागेको हो । केसीको निधनको शोकमा मंगलबार दिउँसो १ बजेलाई निर्धारित शीर्ष तहका नेताको बैठक स्थगित भएको थियो ।

पार्टीमा उत्पन्न विवादको समधानका लागि सोमबार पनि कांग्रेस शीर्ष नेताहरुबीच छलफल भएको थियो । सोमबारको बैठक बिना निष्कर्ष टुंगिएको थियो ।

१४ औं महाधिवेशनको कार्यतालिका, पार्टी केन्द्रीय विभागको गठन, तिनमा भएका मनोनयन, भ्रातृ तथा शुभेच्छुक संस्था, विदेशस्थित जनसम्पर्क समिति र क्रियाशील सदस्यताको वितरणसँग सम्बन्धमा कांग्रेसभित्र विवाद रहेको छ । यस्तै विभाग गठन–मनोनयन, भ्रातृ तथा शुभेच्छुक संस्थाको म्याद थप र महाधिवेशन तथा क्रियाशील सदस्यताको वितरणका विषय पनि विवादित नै छ।

भिडभाडसहितको बैठकका लागि आज सबै केन्द्रीय सदस्यको पीसीआर परीक्षण गरिँदै छ । बिहान ९ बजेबाट दिउँसो १ बजेसम्म पार्टी कार्यालय सानेपामा पीसीआर परीक्षणको व्यवस्था गरिएको छ ।