घनश्याम भूसाल भन्छन्- नेपालका राजनीतिक दलहरू गुटमा परिणत भइसके

काठमाडौं । नेकपा एकीकृत समाजवादीका महासचिव घनश्याम भूसालले नेताहरू सफल भए पनि देश असफल भएको उल्लेख गरेका छन् ।

काठमाडौंमा आयोजित अभ्यासमा संघीय लोकतान्त्रिक गणतन्त्र विषयक राष्ट्रिय गोष्ठीमा बोल्दै महासचिव भूसालले यस्तो टिप्पणी गरेका हुन् ।

महासचिव भूसालले राजनीतिक दलहरुले आफूलाई सफल भएको दाबी गर्ने गरेको भए पनि देश भने असफल भइरहेको बताए।

महासचिव भूसालले हरेक राजनीतिक दलहरूको दस्ताबेजहरूले आफूलाई सफल भएको दाबी गर्ने गरेको भन्दै दल सफल हुँदा देश असफल हुनुको कारण खोज्नुपर्ने बताए ।

नेता र पार्टी सफल हुँदा देश असफल कसरी भइरहेको हो भन्दै उनले प्रश्न गरे । महासचिव भूसालले नेपालका राजनीतिक दलहरू गुटमा परिणत भइसकेको पनि बताए ।

महासचिव भूसालले संघीय लोकतान्त्रिक गणतन्त्र समस्या नभई गणतन्त्रको अभ्यासमा र पात्रहरूमा समस्या भएको बताए ।