किन बालुवाटार जान छाडे प्रचण्ड ?

काठमाडौं । नेपाल कम्युनिष्ट पार्टीका दुई अध्यक्षबीच अहिले आशंकाको सम्बन्ध चलिरहेको छ । पछिल्ला घटनाक्रमले भने अध्यक्ष तथा प्रधानमन्त्री केपी शर्मा ओली अहिले अचम्ममा परेका छन् । 

उनी अचम्ममा पर्नुको कारण भने पार्टीका कार्यकारी अध्यक्ष पुष्पकमल दाहाल प्रचण्ड रहेको बुझिएको छ । 

केही समयअघि प्रचण्ड दिनहुँ बालुवाटार आउँदा हैरान परेका प्रम ओली अहिले भने प्रचण्डलाई भेट्न बोलाइरहेका छन् । तर प्रचण्ड भने उनलाई भेट्न गैरहेका छैनन् । प्रचण्ड बालुवाटार आउनै छोडेपछि भने प्रम ओली र उनको समूह अहिले अनेक आशंका गर्नमा व्यस्त भएका छन् । 

पछिल्लो समय मन्त्रिमण्डल पुनर्गठन, राजदूत नियुक्ति लगायतका विषयमा समेत दुई अध्यक्षबीच मतभेद रहेको बताइन्छ । तर सम्बन्धमा थप चिसोपनको कारण भने कर्णाली प्रदेशको विवाद रहेको विश्लेषण भैरहेको छ । 

सधैं असन्तुष्टि लिएर बालुवाटार जाने प्रचण्ड चुपचाप खुमलटारमै बसेपछि भने ओली समूहको बेचेनी बढेको बुझिएको छ । सोहीकारण पछिल्ला दिनहरुमा ओलीको दूतको रुपमा विष्णु पौडेल, सुवास नेम्वाङ, शंकर पोखरल र प्रदिप ज्ञवाली पालैपालो खुमलटार पुग्ने गरेका छन् । 

शुक्रबार पनि परराष्ट्र मन्त्री ज्ञवालीले अध्यक्ष पुष्पकमल दाहाललाई भेटेका छन्।  ओलीको सन्देश बाहक बनेका ज्ञवालीले ओली–दाहालबीचको संवादहीनता तोड्ने प्रयास गरेको खुमलटार स्रोतले जानकारी दिएको छ । तर प्रचण्ड भने यो पटक नराम्ररी रिसाएकाले उनको प्रयास सफल हुन सकेन । 

ओलीले पार्टीलाई उपेक्षा गरेको र आफूसँग एउटा कुरा गर्ने र काम अर्को गर्ने गरेको भन्दै प्रचण्ड असन्तुष्ट रहेको खुमलटार स्रोतको दावी छ । 

तर प्रचण्डको असन्तुष्टिलाई ओली समूहले भने खतराको रुपमा विश्लेषण गरेको बताइएको छ । सोहीकारण बिहीबारदेखि प्रचण्डले वरिष्ठ नेता माधव नेपालसँग मिलेर संसदीय दलमा ओलीविरुद्ध अविश्वासको प्रस्ताव दर्ता गर्ने हल्ला फैलाइएको छ । यो विषयको समाचारमा ओलीनिकट नेतालाई उद्दृत गरिएको छ । 

पछिल्लो समय प्रमुख प्रतिपक्षी नेपाली कांग्रेस भित्र पनि संसद् बैठक बोलाउन प्रम ओलीलाई दबाब दिनुपर्ने आवाज उठेको छ । कांग्रेसले यो भनाईलाई महत्व दिनु र प्रचण्ड रिसाउनुले अविश्वासको प्रस्ताव संसदीय दलमा सिमित नहुने ओली पक्षको आशंका रहेको छ । सोहीकारण प्रचण्डसँगको मौनता तोड्नका लागि ओलीका दूतहरुको खुमलटार यात्रा बाक्लिएको छ ।

यता प्रचण्ड भने ओलीका दूतहरुको अनेक प्रस्ताव माथि भने माधव नेपाल, झलनाथ खनाल, नारायणकाजी श्रेष्ठ, वामदेव गौतमसँग कहिले सामूहिक कहिले एक्लाएक्लै छलफल गरिरहेका छन् । नेत नेपाल निकट नेताका अनुसार अहिले प्रचण्ड बालुवाटार जानु ठीक नरहेको सोही समूहको निर्णय हो ।

यस्तै वरिष्ठ नेता झलनाथ खनालले दुई अध्यक्षबीच एक्लै कुराकानी गर्नुको औचित्य नरहेको सार्वजनिक अभिव्यक्ति दिइसकेका छन् । 

दुई पार्टी एक भए पनि दुई कित्ता भएसँगै आशंका र तनावपूर्ण रहेका नेकपाको आन्तरिक राजनीति फेरि अप्ठ्यारोमा पर्न थालेको विश्लेषण भैरहेको छ । केही दिनभित्र प्रधानमन्त्री ओलीले तीनजना मन्त्री फेर्ने हल्लाका बीच यो विवाद समाधानको सम्भावना कम रहेको नेकपाकै एक नेता बताउँछन् ।