प्रधानमन्त्रीको बचाउ गरेका परराष्ट्रमन्त्री ज्ञवालीलाई रविन्द्र मिश्रका ८ प्रश्न

काठमाडौं । प्रधानमन्त्री केपी शर्मा ओली र भारतीय गुप्तचर संस्था रिसर्च एन्ड एनालाइसिस विङ (रअ) का प्रमुख सामन्तकुमार गोयलबीच भएको भेटवार्ताका विषय अझै सेलाउन सकेको छैन । 

विभिन्न दलका नेतादेखि आफ्नै पार्टीबाट समेत कुटनीतिक मर्यादा विरुद्ध जासुरी संस्थाका प्रमुखसँग भेटेका प्रधानमन्त्रीको भने परराष्ट्रमन्त्री प्रदीप ज्ञवालीले बचाउ गरेका छन् । उनले गोयललाई भारतीय प्रधानमन्त्री प्रतिनिधि भन्दै भेटको औचित्य पुष्टि गर्न खोजेका हुन् । 

प्रधानमन्त्री बचाउमा थुप्रै समय खर्चेका ज्ञवालीलाई साझा पार्टीका संयोजक रवीन्द्र मिश्रले आठओटा प्रश्न गरेका छन्। उनले सामाजिक सञ्जाल फेसबुक मार्फत प्रश्नको चाङ लगाएका हुन् । 

‘त्यसो हो भने त्यति हाइप्रोफाइल भ्रमणबारे पहिल्यै जानकारी किन नदिएको,’ फेसबुकमा मिश्रले प्रश्न गरेका छन्, ‘भारतीय प्रधानमन्त्रीले आफ्ना गुप्तचर प्रमुखलाई नेपालका प्रधानमन्त्रीलाई भेट्न पठाउनु हेपेको हो कि होइन?’

यस्तो छ रविन्द्र मिश्रको प्रश्नहरु:-

परराष्ट्रमन्त्री ज्ञवालीलाई प्रश्न:

भारतीय गुप्तचर प्रमुख भारतीय प्रधानमन्त्रीको प्रतिनिधिका रूपमा आएका हुन्: परराष्ट्रमन्त्री प्रदिप ज्ञवाली आज विहान कान्तिपुर हेडलाइनर्समा।

१. त्यसो हो भने त्यति हाइप्रोफाइल भ्रमणबारे पहिल्यै जानकारी किन नदिएको?

२. युद्धको अवस्थामा भए भिन्दै कुरा, तर अहिलको सामान्य अवस्थामा भारतीय प्रधानमन्त्रीले आफ्ना गुप्तचर प्रमुखलाई विशेष विमानद्वारा नेपालका प्रधानमन्त्रीलाई भेट्न पठाउनु नेपालका प्रधानमन्त्रीलाई, अलिअलिमात्र होइन, पूर्णरूपमा हेपेको हो कि होइन?

३. नेपालका प्रधानमन्त्रीलाई आफ्नो खुफिया एजेन्सीको प्रमुखको तहमा झारेको हो कि होइन?

४. नेपालका प्रधानमन्त्रीले नेपाली गुप्तचर निकायका प्रमुखलाई प्रतिनिधि बनाएर भारतीय प्रधानमन्त्रीलाई भेट्न पठाउँछु भनेर प्रस्ताव राखे भने, के भारतीय प्रधानमन्त्रीले भेट दिन्छन्?

५. भारतीय प्रधानमन्त्रीको ‘प्रतिनिधि’ का रूपमा आएको हो भने दिल्लीस्थित नेपाली राजदूतावाससँग समन्वय भयो कि भएन? परराष्ट्र मन्त्रालयसँग सम्मनवय भयो कि भएन?

६. भएको भए, नेपालको परराष्ट्र मन्त्रालयका प्रवक्ताले “हामीलाई गोयलको भ्रमणबारे जानकारी छैन” किन भनेको? अनि तपाईं अहिले प्रधानमन्त्रीको प्रतिनिधिका रूपमा आएको भन्दै हुनुहुन्छ, त्यसो हो भने परराष्ट्र मन्त्रालयलाई किन जानकारी भएन?

७. भेटघाटमा के परराष्ट्र मन्त्रालयका प्रतिनिधि थिए?

८. यो देशमा प्रधानमन्त्री र परराष्ट्रमन्त्री छन् कि छैनन्?

ढाकछोपको पनि सीमा हुन्छ। यो देशको स्वाभिमान यति तल्लो तहमा विरलै झरेको थियो। सुसंस्कृत राजनीति भएको देशमा हो भने प्रधानमन्त्रीमाथि राष्ट्रिय सुरक्षामा खतरा पुर्याएको गम्भिर आरोपमा छानविन हुन सक्थ्यो। तर विडम्वनाको कुरा, भ्रष्टाचारमात्र होइन यो देशमा राष्ट्रघातलाई सहन गर्नेहरूको संख्या पनि बढ्दैछ।