नेकपाको कर्णालीको विवाद प्रदेश संसदीय दलले टुंगो लगाउने

काठमाडौं । कर्णाली प्रदेशका मुख्यमन्त्री महेन्द्र बहादुर शाहीविरुद्ध अविश्वासको प्रस्तावमाथि छलफल हुने भएको छ । आज बस्ने कर्णाली प्रदेशको नेकपा संसदीय दलको बैठकमा अविश्वासको प्रस्तावमाथि छलफल हुन लागेको हो । 

सत्तारुढ नेकपाको कर्णाली प्रदेशसभाका सांसदहरूले संसदीय दलका नेता एवं प्रदेशका मुख्यमन्त्री महेन्द्रबहादुर शाहीविरूद्ध २५ असोजमा अविश्वासको प्रस्ताव दर्ता गरेका थिए । 

प्रदेशसभाका १८ जना सांसदले हस्ताक्षर गरी नेकपा संसदीय दलको कार्यालयमा अविश्वास प्रस्ताव दर्ता गरेपछि नेकपाभित्र विवाद चुलिएको थियो । 

अविश्वासपत्रमा शाहीले संसदीय दलको नेता निर्वाचित भएपछि प्रभावकारी काम गर्न नसकेको र प्रदेश सरकारको कामकारबाहीका कारण जनस्तरमा सरकार र पार्टीको उपस्थिति फितलो बन्न पुगेको आरोप लगाइएको थियो ।