झलनाथ खनालको टिप्पणी- आवश्यक नभएकालाई जति कन्याए पनि पार्टी बन्दैन

काठमाडौँ । नेकपा एकीकृत समाजवादीका सम्मानित नेता तथा पूर्वप्रधानमन्त्री झलनाथ खनालले समाजको वर्गीय संरचना र अन्तर्विरोधलाई ध्यानमा राखेर पार्टी विधान निर्माण गर्दै त्यसलाई कार्यान्वयन गर्न सकिए मात्रै पार्टी सबल र सुदृढ बनाउन सकिने टिप्पणी गरेका छन् ।

बुधवारबाट सुरु भएको सो पार्टीको सातौँ केन्द्रीय कमिटी बैठकमा धारणा राख्दै खनालले पार्टी बनाउँदा समाजको वर्गीय संरचना र अन्तर्विरोधलाई ध्यानमा राख्नुपर्ने बताएका हुन् ।

‘वर्ग पहिचान मुख्य कुरा हो । पार्टी काम कहाँ केन्द्रित गर्ने भन्नेमा ध्यान दिनुपर्छ । खास वर्गमा केन्द्रित गर्न सकेनौँ भने पार्टी बन्दैन । जसलाई क्रान्तिको आवश्यक छ त्यो ठाउँमा गयौ भने मात्र पार्टी बन्छ । जसलाई आवश्यक छैन उसलाई जति कन्याउनुस् पार्टी बन्दैन’, खनालले भने, ‘यो हिसाबले विधान बनाउँदा सोच्नुपर्छ ।’