कोरोनाको कारण चौतर्फी विकास गर्न पाइएन: प्रधानमन्त्री

काठमाडौं। प्रधानमन्त्री केपी शर्मा ओलीले मुलुकमा चौतर्फी विकास गर्न सरकारले चाहे पनि कोरोनाले समस्या ल्याएको बताएका छन्।  

आइतबार झापाको दमक अस्पताल भवनको भर्चुअल शिलान्यास गर्ने कार्यक्रममा प्रधानमन्त्री ओलीले यस्तो बताएका हुन् बताए।

‘चौतर्फी रूपमा विकास गर्न खोजेको कोरोनाले समस्या ल्याएको छ। तर देश नै विकासको बाटोमा अग्रसर भइरहेको छ,’ उनले भने, ‘अनेक ठाउँमा शिलान्यास भइरहेका छन्। विद्यालय, विश्वविद्यालय, बाटा, सरकारी भवन निर्माण भैरहेको छ।’

उनले देश विकास भैरहेको बताउँदै हरेक दिन शिलान्यास भैरहेको समेत दावी गरे । प्रधानमन्त्री ओलीले झापामा बन्‍न लागेको रङ्शालामा अवरोध हुनु दुःखद भएको बताएका हुन् । प्रधानमन्त्री ओलीले अहिले तोकिएको ठाउँमा रङ्गशाला बनाउन अवरोध भए ठाउँ सारेर भए पनि बनाइ छाड्ने अठोट  व्यक्त गरे ।

प्रधानमन्त्री ओलीले सरकारले पछिल्लो समय हवाइ उड्डयन क्षेत्रमा ठुल्ठूला प्रगति हासिल गरेको बताए । उनले छिट्टै पूर्वपश्चिम रेलमार्ग पनि बनााउने र जल यातायात पनि सुरु गर्ने जिकिर गरे । रेल्वे सेवाका लागि नयाँ रेल खरिद गरेर ल्याइसकिएको उनको भनाइ थियो ।

अर्को प्रसंगमा प्रधानमन्त्री ओलीले सरकार कोभिड-१९ नियन्त्रणमा लागिपरेको र चाँडै सफलता मिल्ने जिकिर पनि गरे ।