पोखरा । विभिन्न जिल्लाको प्रमुख जिल्ला अधिकारी समेत भइसकेका र हाल लोमनथाङ गाउँपालिकाका प्रमुख प्रशासकीय अधिकृत शेषकान्त पौडेललाई स्थानीवासीले सात दिन क्वारेन्टाइनमा बस्न आग्रह गर्दा उनले अस्वीकार गरेका छन् । उनी पोखराबाट लोमनथाङ फर्किएपछि उनलाई स्थानीयले क्वारेन्टाइनमा बस्न आग्रह गरेका थिए । तर उनले नमानेपछि स्थानीयले फर्काइदिएका छन् ।
स्थानीयवासीको उक्त आग्रहलाई अस्वीकर गरेपछि लोमानथाङ गाउँपालिकाका प्रमुख प्रशासकीय अधिकृत पौडेल शुक्रबार नै जोमसोम फर्किनुपरेको थियो ।
विश्वव्यापी महामारीका रूपमा फलिएको कोभिड–१९ को रोकथाम तथा नियन्त्रण गर्न उपल्लो मुस्ताङको लोमान्थाङ–५ का युवा सक्रियताका साथ लागेका छन् । उनीहरुले शुक्रबार कोरोना रोकथाम तथा नियन्त्रण समिति समेत गठन गरेका छन् ।
यस अगाडि कोरला घुम्न आएका बेनी–जोमसोम सडक खण्डका दुई सरकारी गाडीलाई युवाहरुले बाटोमै रोकेका थिए । गाउँले समेतलाई विशेष काम बाहेक बाहिर निस्कन नपाइने नियम लागू गरेका छन् ।
यदि कुनै कारणले कोही नयाँ व्यक्ति गाउँ प्रवेश गरे अनिवार्य क्वारेन्टाइनमा बस्नुपर्ने नियमसमेत बनाएका छन् । लोमान्थाङ–५ कोरोना रोकथामसँग आबद्ध समितिका युवाले प्रशासकीय अधिकृत पौडेललाई क्वारेन्टाइन बसेर मापदण्ड पूरा गर्न सुझाएका थिए । तर पौडेलले क्वारेन्टाइनमा नबस्ने जनाउँदै फर्किएको लोमान्थाङका युवा टसी आङया गुरुङले जानकारी दिएका छन् ।
स्थानीयवासीका अनुसार लोमान्थाङ गाउँपालिकाको प्रमुख प्रशासकीय अधिकृतमा सरुवा भई रवाना लिएको चार महिनापछि मात्र पौडेल गाउँ आएका थिए ।
मुस्ताङमा कोरना भाइरसकोे उच्च जोखिम देखेर क्वारेन्टाइन व्यवस्थापन समितिको संयोजक प्रमुख जिल्ला अधिकारी बेदप्रसाद अर्यालको नेतृत्वमा थासाङ गाउँपालिकाको घासामा जनता आधारभूत विद्यालयमा १० शैया, घरपझोङ गाउँपालिका जोमसोमको जनहित माविमा २० शैया, वारागुङ मुक्तिक्षेत्र गाउँपालिकाको कागबेनी र मुक्तिनाथमा छ शैंया, लोघेकर दामोदरकुण्ड गाउँपालिका चराङको युवा क्लब भवनमा आठ शैंया र लोमान्थाङ गाउँपालिकाको लोमान्थाङ वडा कार्यालयमा १४ शैंया क्षमताको क्वारेन्टाइन स्थापना गरेको प्रमुख जिल्ला अधिकारी अर्यालले बताए । हालसम्म सात जनालाई घासाको क्वारेन्टाइनमा राखेको उनले बताए ।
