पोर्चुगल र कुवेत पठाइदिन्छु भन्दै लाखौं ठगी, दुई जना पक्राउ

काठमाडौं। वैदेशिक रोजगारीमा विदेश पठाइदिन्छु भन्दै पैसा ठगी गरेको आरोपमा दुई जना परेका छन् । पक्राउ पर्नेमा रोल्पा घर भई हाल काठमाडौं बस्ने ३९ वर्षीय निमराज डाँगी र पाल्पा घर काठमाडौ बस्ने ३३ वर्षीय चक्र पोखरेल रहेका छन् ।

डाँगीले जोनसन श्रेष्ठलाई पोर्चुगल पठाइदिन्छु भन्दैj १० लाख रुपैयाँ ठगी गरेका थिए । पटक–पटक रकम लिएर उनी सम्पर्कविहीन बनेपछि काठमाडौं उपत्यका अपराध अनुसन्धान कार्यालयले उनलाई गोङ्गबुबाट पक्राउ गरेको हो ।

पोखरेलले दीपेश तामाङ कुवेत पठाइदिन्छु भन्दै १ लाख ८६ हजार रुपैयाँ रकम लिएर सम्पर्क विहीन बनेका थिए । उनलाई वसुन्धराबाट पक्राउ गरिएको प्रहरीले जनाएको छ । दुवैलाई अनुसन्धान र कारबाहीका लागि वैदेशिक रोजगार विभाग ताहाचल पठाइएको छ ।