कर्णालीको नेकपा विवाद मिलाउन प्रधानमन्त्री सक्रिए, काठमाडौं बोलाए दुबै पक्षलाई

काठमाडौं । कर्णाली प्रदेशमा नेकपाको जारी विवाद मिलाउन पार्टीका प्रधानमन्त्री केपी शर्मा ओली सक्रिय भएका छन् । आफ्नै पार्टीका मुख्यमन्त्री विरुद्ध अविश्वासको प्रस्ताव दर्ता गरेर केन्द्रलाई समेत तरंगित बनाएको सो विवादमा अनेक ट्विस्ट आइसकेको छ । 

कर्णालीको विवादले गम्भीर रुप लिएपछि अविश्वासको प्रस्ताव ल्याउने पक्ष र मुख्यमन्त्री महेन्द्रबहादुर शाहीलाई छलफलका लागि प्रम ओलीले काठमाडौं बोलाएका हुन्। यस्तै अनेक ट्विस्ट ल्याउने गरी भैरहेको गतिविधि बन्द गर्न समेत दुबै पक्षलाई आग्रह गरिएको नेकपा स्रोतले जानकारी दिए । 

आज नै प्रधानमन्त्री ओली र पार्टीका अर्का अध्यक्ष पुष्पकमल दाहाल प्रचण्डबीच छलफल भइ दुबै पक्षलाई बोलाउन निर्णय भएको बालुवाटार स्रोतले बताएको छ । दुबै पक्षलाई सहमत गराउने गरी बोलाइएको समेत ती स्रोतको दावी छ । अविश्वासको प्रस्ताव ल्याउन नेतृत्व गर्ने यामलाल कँडेल र मुख्यमन्त्री महेन्द्रबहादुर शाहीसहितको पक्षलाई बोलाइएको हो ।  

यसअघि मंगलबार नै अविश्वासको प्रस्तावमा हस्ताक्षर गर्ने माधव नेपाल पक्षका ७ जनाले हस्ताक्षर फिर्ता लिने घोषणा गरेका थिए। यस्तै शाहीले मंगलबार नै प्रदेश सभामा नेपालपक्षीय सांसद कुर्मराज शाहीलाई सचेतक तोकिसकेका छन्। यस्तै नेपालनिकट सांसदलाई एक मन्त्रालयसहित महत्वपूर्ण नियुक्तिमा बाँडफाँड गर्ने सहमति समेत भएको बताइएको छ।

यसैबीच प्रधानमन्त्री ओलीले हस्तक्षेप गरेर अविश्वास प्रस्ताव अगाडि नबढाउन र तुरुन्त काठमाडौं आउन निर्देशन दिएका हुन्।