मुख्यमन्त्री शाहीलाई सच्चिने मौका दिन माधव नेपालको प्रस्ताव

काठमाडौं । नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले कर्णाली प्रदेशका मुख्यमन्त्री महेन्द्रबहादुर शाही सच्चिनुपर्ने र त्यसका लागि मौका दिनुपर्ने मत जाहेर गरेका छन् । 

कर्णाली प्रदेश संसदीय दलका १८ सांसदले मुख्यमन्त्रीविरुद्ध अविश्वासको प्रस्ताव दर्ता गरेपछि नेता नेपालले यो विचार राखेका हुन् । ती १८ सांसदमा माधव नेपालनिकट सांसद पनि भएपछि नेकपा अध्यक्ष पुष्पकमल दाहाल प्रचण्डले नेता नेपालसँग यो विषयमा कुरा गरेका थिए । 

यतिबेला नेकपाको केन्द्रको राजनीति नै अप्ठ्यारो अवस्थामा रहेकाले प्रदेशमा बखेडा झिक्नु उपयुक्त नहुने लाइनमा नेता नेपाल छन् । सोहीकारण अहिले नै मुख्यमन्त्री हटाउने कदमलाई रोक्नका लागि उनले आफूनिकट नेतालाई सुर्खेत खटाइसकेका छन् ।

स्रोतका अनुसार मुख्यमन्त्रीविरुद्ध पार्टी अध्यक्ष तथा प्रधानमन्त्री केपी शर्मा ओली र नेता नेपाल पक्षधर सांसदहरुको यो कदमपछि प्रचण्डको सक्रियता बढेको हो । 

तर स्थानीय नेताहरु भने मुख्यमन्त्री शाहीको कार्यशैलीबाट चिढिएको बताइन्छ । कर्णालीका प्रदेश कमिटी, संसदीय दललाई उपेक्षा गर्ने उनको स्वभावको कारण यस्तो अवस्था आएको कर्णाली प्रदेशका एक नेकपा सांसदले बताए । 

तर अहिलेको अवस्थामा शाहीलाई हटाउँदा अप्ठ्यारो पर्ने भएकाले नेता नेपाल ब्याक भएको बताइएको छ । यस्तै प्रधानमन्त्री केपी शर्मा ओली समेत यो कदमप्रति त्यति सकारात्मक नभएको स्रोतको दावी छ । आज बिहान प्रचण्डले प्रम ओलीसँग भेटेर यो कदम रोक्न आग्रह नै गरिसकेका छन् ।