ओली-प्रचण्ड आज पनि छलफलमा, मन्त्री चयनमा सहमति जुटाउने प्रयास

काठमाडौं । नेपाल कम्युनिष्ट पार्टीका अध्यक्षद्वय केपी शर्मा ओली र पुष्पकमल दाहाल ‘प्रचण्ड’ छलफलमा जुटेका छन्। प्रधानमन्त्री निवास बालुवाटारमा प्रधानमन्त्रीसमेत रहेका ओली र अध्यक्ष प्रचण्डबीच अहिले  छलफल भैरहेको छ।

केही समययता मन्त्रिपरिषद् पुनर्गठन र पार्टी एकताका बाँकी कामलाई पूर्णता दिने विषयमा अध्यक्षद्वयबीच छलफल जारी छ। तर, निष्कर्ष भने निस्किन सकेको छैन। बिहीबारको भेटमा पार्टी एकताका विषयमा छलफल भएको थियो।

गत, असोज ६ गते बसेको सचिवालय बैठकले पार्टी एकताका कामलाई पूर्णता दिने विषयमा प्रस्ताव ल्याउने जिम्मेवारी अध्यक्षद्वय र महासचिवलाई दिएको थियो।

१० दिनभित्र एकताको प्रस्ताव ल्याउने जिम्मेवारी दिएपनि अझैसम्म प्रस्ताव तयार भइ नसकेको नेताहरु बताउँछन्।

त्यस्तै ४ गतेको बैठकले मन्त्रिपरिषद् पुनर्गठनका विकल्पका विषयमा छलफल गरेको थियो।

पुनर्गठनका विषयमा सहमति नभएकाले अहिले रिक्त मन्त्रालयहरुमा मात्र मन्त्री नियुक्ति गर्ने गृहकार्य भइरहेको छ। हाल अर्थ, सञ्चार र सहरी विकास मन्त्रालय रिक्त छ। ती मन्त्रालयमा कसलाई मन्त्री बनाउने भन्ने विषयमा दुई अध्यक्षबीच सहमति जुटाउने प्रयास भैरहेको बताइएको छ ।