बारामा गोली हानेर रूपेश सर्राफको हत्या गर्ने एकजना समातिए, जोडियो ६० किलो सुन तस्करी काण्ड

काठमाडौं । गोली हानेर बारा जिल्लास्थित बाल एकता इङिलस बोर्डिङ्ग स्कुलका प्रधानाध्यापक रूपेश सर्राफको हत्या गरेको आरोपमा प्रहरीले एकजनालाई नियन्त्रणमा लिएको छ । पक्राउ परेका आरोपितलाई प्रहरीले सार्वजनिक भने गरेको छैन ।

बारा कलैया उपमहानगरपालिका–६ का रूपेशमाथि आज दिउँसो १ बजे २ वटा मोटरसाईकलमा आएका ४ जनाको समूहले कलैया बजारमै गोली प्रहार गरेका थिए । तीनवटा गोली लागेर गम्भीर घाइते भएका उनलाई अस्पताल पुर्‍याएलगत्तै डाक्टरले मृत घोषणा गरेको मधेस प्रहरी प्रमुख डीआईजी जनक भट्टराईले जानकारी दिए ।

प्रहरीका अनुसार उनीमाथि पाँचवटा गोली प्रहार भएको थियो । उनीमाथि दुईवटा मोटरसाइकलमा आएको समूहले गोली प्रहार गरेको प्रहरी बताउँछ ।

सुन प्रकरण हत्याको कारण हुन सक्ने प्रहरीको आशंका:

रूपेशको हत्यालगत्तै प्रहरीको केन्द्रीय अनुसन्धान ब्युरो (सीआईबी)ले पनि घटनाबारे चासो राखेको छ । हत्या गरिएका रूपेश ६० किलो सुन तस्करी प्रकरणमा पक्राउ परेका बाराकै सुनचाँदी व्यवसायी संघका अध्यक्ष शिवकुमार सर्राफका आफन्त हुन् ।

बारा प्रहरी प्रमुख एसपी सुरेश काफ्लेले घटनाबारे विभिन्न तरिकाबाट अनुसन्धान थालिएको बताए।