हिक्मत कार्कीको गुनासो- कांग्रेस र माओवादी नमानेपछि केदार कार्कीलाई सहयोग गर्‍यौं

विराटनगर । नेकपा एमाले कोशी प्रदेश संसदीय दलका नेता हिक्मतकुमार कार्कीले सत्तारुढ नेपाली कांग्रेस र माओवादी केन्द्रले सहकार्य गर्न नमानेपछि केदार कार्कीलाई मुख्यमन्त्री बनाउन सहयोग गरेको गुनासो गरेका छन् ।

प्रदेशमा कुनै पनि दललाई बहुमत नभएकाले आपसमा सहकार्य गर्नुपर्ने बाध्यता रहेको भन्दै उनले कांग्रेस र माओवादीले सहकार्य गर्न नमानेपछि कांग्रेसको एक समूहसँग सहकार्य गरेको बताएका हुन् ।

‘कांग्रेसको संस्थापनपष तयार भएन हामीसँग सहकार्य गर्न, हामीलाई स्वीकार्न तयार भएन, माओवादी हामीलाई स्वीकार्न तयार भएन’ उनले भने, ‘जो आउँदा पनि हामी सहयोग गर्न तयार छौं भनेर खुला रुपमा नै भनेका थियौं । अन्तिम दिनमा केदार कार्कीजीले सहयोग माग्नुभयो, हामीले सहयोग गर्‍यौं ।’

उनले आफूहरुले गल्ती नगरेको र संविधान अनुसार नै काम गरेको बताए । ने्ता कार्कीले गल्ती भएको भए सार्वजनिक ठाउँमा उभिएर माफी माग्न तयार भएको पनि बताए ।