काठमाडौं । भारतीय भुमीमा अलपत्र रहेका नेपालीको लागि सीमा नाका नखोल्ने भएको छ । सर्वोच्च अदालतले भारतीय भूमिमा सीमा नाका सञ्चालनको लागि अन्तरिम आदेश दिन अस्वीकार गरेसँगै सीमा नाका नखोलिने भएको हो ।
बिहीबार न्यायाधीश हरिकृष्ण कार्कीको इजलासले अधिवक्ता मनिषकुमार श्रेष्ठले दायर गरेको रिटमाथि सुनुवाई गर्दै सीमा नाका निर्वाध सञ्चालनका लागि अन्तरिम आदेश दिन अस्वीकार गरेको हो ।
सर्वोच्चका सूचना अधिकारी देवेन्द्र ढकालले सर्वोच्चले अन्तरिम आदेशका लागि २४ गते दुबै पक्षलाई छलफलमा बोलाएको जानकारी दिए ।
रिट निवेदक श्रेष्ठले नेपाल प्रवेश गर्न सयौं नेपाली नागरिक भारतीय भूमिमा पर्खेर बसेको भन्दै सीमा नाका निर्वाध सञ्चालनका लागि अन्तरिम आदेश माग गरेका थिए ।
सर्वोच्च सीमा नाका सञ्चालन गर्न अन्तरिम आदेश माग गर्दै यसअघि पनि रिट दायर भएको थियो । उक्त रिटमा २४ गते सुनुवाई हुँदैछ । दुबै एकै प्रकृतिको विषय भएकाले एकै दिन सुनुवाई हुने ढकालले बताए ।
