अर्जेन्टिनाको कठिन जित, ब्राजिल बराबरीमा रोकियो

काठमाडौं । विश्वकपको दक्षिण अमेरिकी छनोटअन्तर्गत शुक्रबार बिहान भएका खेलमा अर्जेन्टिना विजयी भएको छ भने ब्राजिल बराबरीमा रोकिएको छ।

घरेलु मैदानमा पाराग्वेविरुद्ध उत्रिएको अर्जेन्टिना १-० गोलले विजयी भयो । अर्जेन्टिनाका निकोलास ओटामेन्डीले निर्णायक गोल गरे । खेल सुरू भएको तेस्रो मिनेटमै उनले रोड्रिगो डी पलको पासमा गोल गरेका थिए । चोटबाट गुज्रिरहेका लियोनल मेस्सीलाई दोस्रो हाफमा मैदान प्रवेश गराइएको थियो ।

छनोट प्रतियोगितामा अर्जेन्टिनाले लगातार तेस्रो जित हात पारेको हो । ३ खेलबाट ९ अंक भएको अर्जेन्टिना तालिकाको शीर्षस्थानमा छ । दोस्रो स्थानमा रहेको ब्राजिलको ३ खेलबाट ७ अंक छ । शुक्रबार बिहान भएको अर्को खेलमा ब्राजिलले भेनेजुएलासँग १-१ गोलको बराबरी खेलेको हो ।

घरेलु मैदानमा उत्रिएको ब्राजिलले ५०औं मिनेटमा गाब्रियल जिससको गोलमा अग्रता लिएपनि भेनेजुएला बराबरीमा फर्किएको थियो । ८८औं मिनेटमा एडुवार्ड बेल्लोले खेल बराबरीमा ल्याएका थिए।