प्रदेशको नाम र राजधानी टुंग्याएर सकियो प्रदेश ५ सभाको छैठौं अधिवेशन

काठमाडौं । प्रदेशको नाम र स्थायी राजधानीको टुंगो गरेर प्रदेश ५ को छैठौं अधिवेशन अन्त्य भएको छ। २० असोज राति १२ बजेदेखि अधिवेशन सकिएको हो।

प्रदेशसभाको छैठौं अधिवेशनको अन्तिम बैठकले लामो समयदेखि बाँकी रहेको प्रदेशको राजधानी तोक्ने र नामाकरण गर्ने कार्य गरेको छ।

प्रदेश ५ को प्रदेशसभाले प्रदेशको राजधानी दाङ र अर्घाखाँचीका पालिकाहरू छोएको दाङको देउखुरी उपत्यका र नाम लुम्बिनी राख्ने प्रस्ताव दुई तिहाइ बहुमतले पारित गरेको छ।

प्रदेशसभामा आज भएको मतदानमा नाम लुम्बिनी राख्ने पक्षमा ७९ जना र विपक्षमा ४ जनाले मतदान गरेका छन्। त्यसअघि प्रस्तावित राजधानी देउखुरी उपत्यकाको पक्षमा र ६९ मत र विपक्षमा १३ मत परेको थियो।

 प्रमुख प्रतिपक्षी दल कांग्रेसले भने सोमबार प्रस्तावित नाम र राजधानीको विरोध गर्दै नाराबाजी र तोडफोड समेत गरेको थियो।  

सरकारले प्रदेशसभामा दर्ता गराएको नाम र राजधानीको प्रस्ताव पारित गराउनका लागि सत्तारुढ दल नेकपाले ह्वीप नै जारी गरेको थियो।