प्रदेश ५ को नाम लुम्बिनी कायम, प्रस्तावको पक्षमा ७९ मत

काठमाडौं । प्रदेश ५ को नाम लुम्बिनी कायम भएको छ। प्रदेशसभामा मंगलबार भएको मतदानमा सरकारले सभामा प्रस्तुत गरेको प्रस्ताव पारित भएपछि प्रदेशको नाम लुम्बिनी कायम भएको हो।

प्रदेश ५ को नाम लुम्बिनी राख्ने प्रस्तावका पक्षमा ‍७९ मत परेको थियो। विपक्षमा ४ मत परेको थियो।

प्रदेश ५ का ८७ सांसदमध्ये ८३ जना मतदानमा सहभागी थिए।

यसअघि भएको मतदानले प्रदेशको राजधानी दाङको देउखुरीलाई कायम गरेको थियो। मंगलबार नै प्रदेशसभाको बैठकले प्रदेशको राजधानी देउखुरी बनाउने प्रस्ताव पारित गरेको हो। 

प्रदेशसभाको मंगलबारको बैठकमा भएको भोटिङबाट दुई तिहाइ बहुमतका साथ दाङको देउखुरीलाई राजधानी बनाउने प्रस्ताव पारित भयो ।

भोटिङमा देउखुरीको पक्षमा ६९ र विपक्षमा १३ मत खसेको सभामुख पूर्णबहादुर घर्तीले जनाए । उनका अनुसार प्रदेशसभामा ८७ सदस्य रहेकामा आजको भोटिङमा ८२ सांसद उपस्थित रहे । भोटिङमा देउखुरीको पक्षमा बहुमत आएसँगै उनले स्थायी राजधानीको प्रस्ताव पारित भएको घोषणा गरे । हाल प्रदेशको अस्थायी राजधानी रुपन्देहीको बुटवलमा रहेको थियो ।