नेकपा सचिवालय बैठक अनिश्चितकालका लागि स्थगित

काठमाडौं । पछिल्लो समय कोरोना संक्रमणको जोखिम बढेसँगै नेपाल कम्युनिष्ट पार्टी (नेकपा) को स्थायी समिति बैठक स्थगित भएको छ । 

आज दिउँसो ४ बजेको लागि तय भएको अनिश्चितकालको लागि स्थगित गरिएको एक सचिवालय सदस्यले जानकारी दिए ।

गत शुक्रबार प्रम ओली र नेकपा अध्यक्ष पुष्पकमल दाहाल प्रचण्डबीचको छलफलपछि शनिबारका लागि सचिवालय बैठक बोलाउने सहमति भएको थियो । तर शनिबारको बैठक पनि स्थगित भइ आजका लागि बैठक बस्ने भनिएको थियो । 

शनिबार प्रधानमन्त्री कार्यालयका ७८ जनामा कोरोना संक्रमण पुष्टि भएको थियो । यस्तै आइतबार प्रधानमन्त्री केपी शर्मा ओलीका प्रेस विज्ञ रामशरण बजगाईंमा पनि संक्रमण पुष्टि भैसकेको छ । अहिले जोखिम बढेको भन्दै बैठक स्थगित गरेको बताइएको छ । 

अहिले प्रम ओली सबै किसिमको भेटघाट बन्द गरेर बसेको र जोखिम उच्च भएको भन्दै बैठकको स्थगित गर्न दुई अध्यक्ष सहमत भएको बताइएको छ । 

तत्कालको लागि बैठकको मिति तय नगरिए पनि जोखिम भएसँगै बैठकको नयाँ मिति तय गर्ने सहमति भएको खुमलटार स्रोतले जानकारी दिएको छ ।