एमाले बागमती प्रदेश अधिवेशनः लुम्बिनी प्रकरण दोहोरिएला कि सहमति होला ?

काठमाडौँ । नेकपा एमालेको बागमती प्रदेश अधिवेशन यही असोज ८ र ९ गते हुने भएको छ । उक्त अधिवेशनका लागि १३ वटै जिल्लाले प्रतिनिधि छनोटको काम सकेर प्रदेशमा पठाएका छन् ।

अधिवेशन नजिकिएसँगै एमाले बागमती प्रदेश अध्यक्षका दाबेदारहरुको चर्चा सुरु भएको छ । बागमती प्रदेश अध्यक्षमा एमालेका केन्द्रीय सदस्यहरु कृष्णप्रसाद दाहाल, कैलाश ढुंगेल, रचना खड्का, केशव पाण्डेको नाम चर्चामा छ । एकपटक पुनः आफूले नै मौका पाउनुपर्ने पक्षमा हालका अध्यक्ष केशवराज पाण्डे छन् ।

यद्यपि पाण्डेको नेतृत्वमा गएको निर्वाचनमा बागमतीमा एमालेले निर्वाचनमा असफलता ब्यहोरेकाले उनलाई दोहोर्याउने पक्षमा एमाले नेतृत्व देखिंदैन । बागमतीमा प्रतिनिधिसभाका २७ सिटमध्ये ४ सिटमा मात्र एमालेले जितेको थियो ।

मकवानपुरका कृष्णप्रसाद दाहालले जित्दैआएको मकवानपुरमा कमल थापालाई समर्थन गर्दा उनी पनि पराजीत भए । उनले आफूले प्रदेश अध्यक्षमा दाबी गरेका छन् । कैलाश ढुंगेल गएको निर्वाचनमा रामेछापबाट १६ हजारभन्दा बढी मतले पराजीत भएका थिए । उनले पनि प्रदेश अध्यक्षमा अध्यक्ष केपी ओलीको आशीर्वाद आफूलाई रहेको दाबी गरिरहेका छन् । प्रदेश अध्यक्षमा बागमती प्रदेशका पूर्वसभामुख सानुकुमार श्रेष्ठ, पूर्वसांसद कृष्णभक्त पोखरेलको नाम पनि आएको छ ।

रचना खड्काले पनि प्रदेश अध्यक्षमा दाबी गरिरहेकी छन् । लुम्बिनी प्रदेशमा जस्तै एमालेमा ठूला नेताको गुुटबन्दी त देखिएको छैन, तर काभ्रेका गोकुल बास्कोटा र भक्तपुरका महेश बस्नेतले प्रदेश अध्यक्षका लागि कसलाई समर्थन गर्ने हुन्, त्यसले निर्णायक अर्थ राख्छ । लुम्बिनीमा जस्तै अध्यक्ष ओलीको समर्थन छ भन्ने उम्मेदवारलाई देखाइदिने पक्षमा एक पक्ष देखिएको छ ।

मेयर नै प्रतिनिधि बन्नबाट रोकिए

प्रतिनिधि छनोटमा गएको स्थानीय निर्वाचनमा काठमाडौंमा एमालेको प्रतिष्ठा बचाउने बुढानीलकन्ठ नगरपालिकाका मेयर मीठराम अधिकारी नै पर्न सकेनन् । बुढानीलकण्ठ नगरपालिकाबाट ८ जना पुरुष छानिंदा मेयर अधिकारीलाई नै प्रदेश प्रतिनिधि हुनबाट बन्चित गरिएको छ ।

सहमतिका नाममा मेयर अधिकारीलाई प्रदेश प्रतिनिधि आउन नदिन एमाले काठमाडौं जिल्ला अध्यक्ष दीपक निरौला नै लागेको आरोप छ । स्थानीय निर्वाचनमा जितेपछि टिकट दिएबापत निरौलाले भेटी खोजेको तर त्यो नदिएको रिस प्रदेश प्रतिनिधि छान्दा उनले अधिकारीलाई आउट गरी साधेको चर्चा एमाले बृत्तमा छ ।

गएको स्थानीय निर्वाचनमा एमालेले काठमाडौंका महानगरसहित १० पालिकामध्ये बुनपा र टोखामात्र एमालेले मेयरमा जितेको थियो । टोखामा झिनो मतले मेयरमा प्रकाश अधिकारीले जित हासिल गरेका थिए । बुनपामा सानदार ढंगले जित हासिल गरेको थियो । तर टोखाका मेयर अधिकारी प्रदेश प्रतिनिधि छानिंदा बुनपाका अधिकारी भने बन्चित भएका छन् ।

सहमतिको नाममा दीपक निरौलाले उनलाई प्रतिनिधि छान्नबाट नियतबस नै रोकेकोमा अधिकारी रुष्ट भएका छन् । अधिकारी एमालेमा लोकप्रिय भएकै कारण २०५४ को स्थानीय निर्वाचनमा कपन गाविस अध्यक्षमा निर्वाचित भएका थिए ।