आज प्रधानमन्त्री प्रचण्डले न्युयोर्कमा चिनियाँ उपराष्ट्रपतिसँग भेट गर्दै

काठमाडौं । आज प्रधानमन्त्री पुष्पकमल दाहाल ‘प्रचण्ड’ र चीनका उपराष्ट्रपति हान झेङबीच द्विपक्षीय भेटवार्ता हुने भएको छ ।

संयुक्त राष्ट्रसंघको ७८औँ महासभाको ‘साइडलाइन’का क्रममा अमेरिकाको न्युयोर्कमा भेटवार्ता हुने भएको हो ।

महासभामा सहभागी हुन प्रधानमन्त्री प्रचण्ड शनिबार साँझ त्यसतर्फ प्रस्थान गरेका थिए । हिजो आइतबार उनी न्युयोर्क पुगिसकेका छन् ।

न्युयोर्कस्थित राष्ट्रसंघका लागि नेपाली स्थायी नियोग स्रोतका अनुसार आज (सोमबार) प्रधानमन्त्री प्रचण्ड र चिनियाँ उपराष्ट्रपति हानबीच भेटवार्ता हुँदै छ । असोज ६ गतेदेखि सुरु हुने प्रधानमन्त्री प्रचण्डको चीन भ्रमणका एजेन्डामा भेटवार्ता केन्द्रित हुने स्रोतले बतायो ।

राष्ट्रसंघको महासभामा योपटक चिनियाँ प्रतिनिधिमण्डलको नेतृत्व उपराष्ट्रपति हानले गरेका छन् । उनी महासभामा सहभागी हुन न्युयोर्क पुगिसकेका छन् ।

प्रधानमन्त्री प्रचण्डले यही असोज ४ गते राष्ट्रसंघको महासभामा सम्बोधन गर्ने कार्यक्रम छ । असोज ५ गते उनी न्युयोर्कबाट सिधै चीनतर्फ लाग्नेछन् ।