मुख्यसचिवमा शंकरदास बैरागी नियुक्त

काठमाडौं । सरकारले मुख्यसचिवमा शंकरदास बैरागीलाई नियुक्त गरेको छ । बिहीबारको मन्त्रिपरिषद् बैठकले बैरागीलाई मुख्यसचिवको जिम्मेवारी दिने निर्णय गरेको हो । 

मुख्यसचिव पदमा रहेका लोकदर्शन रेग्मीले आजै मुख्यसचिव पदबाट राजीनामा दिएका हुन् । सरकारले आजैको बैठकबाट उनलाई बेलायतको राजदूत नियुक्त गरेको छ ।  

रेग्मीको कार्यकाल आगामी कार्तिक ६ गते सम्म भएपनि सरकारले उनलाई राजदूत बनाएर सो पदमा बैरागीलाई ल्याएको हो ।

निजामति सेवा ऐन २०४९ अनुसार मुख्य सचिवका रुपमा तीन वर्ष र सचिवका रुपमा पाँच वर्ष काम गर्न पाउने व्यवस्था छ। उमेर हद भने सबैका लागि ५८ वर्ष नै रहने व्यवस्था छ।

शंकरदास बैरागी हाल परराष्ट्र सचिवको रुपमा कार्यरत थिए । उनले यही असोज २१ गते नियमित अवकास पाउँदै थिए। उनलाई मुख्यसचिव बनाउनका लागि नै प्रधानमन्त्री केपी शर्मा ओलीले मुख्यसचिव रेग्मीलाई आजै राजीनामा गर्न लगाई बेलायतको राजदूत पदमा नियुक्त गरेका छन् ।