राकेश अडुकियाः २२ क्वीन्टल सुन तस्करी, हुन्डीदेखि अदालतमा सेटिङ गरी टेस्ला गाडी आयातसम्म ?

काठमाडौं । राजस्व अनुसन्धान विभागले एक क्वीन्टल सुन तस्करी प्रकरणमा व्यापारी राकेशकुमार अडुकियाको घरमा छापा मारेको छ । हङकङबाट भित्रिएको तस्करीको क्वीन्टल सुन प्रकरणमा व्यापारी राकेशकुमार अडुकिया अनुसन्धानमा तानिएका हुन् ।

विवादास्पद पृष्ठभूमि भएका अडुकिया तस्करीको सुन भारतसम्म पुर्याउन सक्रिय रहेको आशंका राजस्व अनुसन्धान विभागले गरेको छ । अनुसन्धानकै क्रममा विभागले बुधबार अडुकियाको घरमा छापा मारेर केही कागजात नियन्त्रणमा लिएको छ । सुन बरामदपछि अडुकिया सम्पर्कविहीन छन् । उनका छोरा रोहन अडुकिया साउन २ गते सुन बरामदपछि नै हङकङ फरार भइसकेका थिए । सुन बरामदभन्दा केही समयअघि शंकास्पद रुपमा हङकङ, भारत र दुवई भ्रमण गरेको देखिएपछि विभागले अडुकियाको घरमा छापा मारेको जनाएको छ । राजस्वले खोजी गर्दासम्म उनी भागिसकेका थिए ।

गोरखा विकास बैंक घोटाला र सेयर कारोबारमा विवादास्पद पृष्ठभूमि भएका अडुकिया यसअघि नै विभागको निगरानीमा थिए । उनी केही बैंक–वित्तीय संस्थामा यसअघि सञ्चालक समिति सदस्य रहिसकेका व्यक्ति हुन् । व्यापारी अडुकिया पछिल्लोपटक जुन २६ मा त्रिभुवन विमानस्थलबाट भारत गएका थिए । त्यतैबाट हङकङ पुगेका उनी जुलाई ५ मा दुबई हुँदै नेपाल आएका थिए । उनी नेपाल आएपछि हङकङबाटै नेपालमा सुन भित्रिएको विभागका अधिकारीहरुको आशंका छ ।

को हुन अडुकिया

राकेश अडुकियाका बाबु शिवकुमार अडुकिया पनि नेपालको डलर तस्करीमा संलग्न चर्चित व्यक्ति थिए । नेपालको सबैभन्दा ठूलो डलर कारोवारीका रूपमा उनको नाम थियो । बजारभरिको डलर उनले नै संकलन गर्ने गर्दथे । भारतको राजस्थानबाट नेपाल प्रवेश गरेका शिवकुमार अडुकियाको डेढ बर्षअघि दुबईमा कान्छो छोरा मुकेश अडुकियाको घरमा निधन भएको थियो । हाल कान्छो छोरा मुकेश दुबईमा नै बस्छन् । उनले सिपी खेतानको बहिनीसँग बिहे गरेका हुन् ।

शिवकुमारका जेठा छोरा हुन् राकेश अडुकिया । उनले बिनोद जाजोदियाको छोरीसँग बिहे गरेका हुन् । बिनोद जाजोदिया पट्रोल व्यापारी हुन् । राकेश अडुकिया भने मालिगाउँमा बस्ने गर्दछन् । उनले दरवारमार्ग नजिकै टेस्ला गाडीको नेपालको एजेन्सीसंगै कार्यालय समेत खोलेका छन् । उनीहरूले भारतको दिल्लीस्थित गुडगाउँमा पनि घर लिएका छन् ।

शिवकुमार अडुकियाले डलरको तस्करी धन्दा गरिरहेका बेला तत्कालीन प्रहरी महानिरीक्षक प्रदिप शमशेर जवराको सचिवालयबाट खटिएको टोलीले गाडी सहित ठूलो मात्रामा डलर बरामद गरेको थियो । पछि डलर कारोवारी भएको भन्दै प्रहरीको तत्कालीन बिशेष टोलीले अडुकियासँग ठूलो रकम लिने गरेको तथ्य पनि त्यतिबेलाका छापाहरूमा समाचार आएका थिए । राकेश अडुकियाले कृषि प्रेमुरा नामक कम्पनी खोलेर हुन्डी र डलर र हुन्डीको कारोबार गर्ने गरेका थिए ।

अडुकियाको अरेटी इन्टरनेसनल कम्पनीले टेस्ला गाडीको आयात गर्दैआएको छ । टेस्ला गाडीको एजेन्सी नभएकाले ल्याउन पाईँदैनथ्यो । तर सर्वोच्च अदालतका तत्कालीन प्रधानन्यायाधीश चोलेन्द्रशमशेर जबरालाई प्रभावमा पारी २०७७ असारमा अडुकियाले टेस्ला गाडी भित्र्याउन पाउने फैसला गराएका थिए ।

अडुकियामाथि टेस्ला गाडीमा मूल्य घटाएर नेपाल आयात गरेको देखाई करोडौंंको राजस्व ठगी गरेको आरोप पनि छ । चीनमा ४९ हजार डलरमा बिक्री भइरहेको टेस्ला मोडल थ्री नेपाल ल्याउँदा ३५ हजार डलरमा किनेको बिल पेस गरिएपछि करोडौं रुपियाँको राजस्व चोरी भएको समाचार पनि सार्वजनिक भएको थियो ।