केही नेपाल ऐन संशोधन विधेयक हुबहु पारित हुन्न : कानुनमन्त्री गुरुङ

काठमाडौं । कानूनमन्त्री तथा कांग्रेस उपसभापति धनराज गुरुङले केही नेपाल ऐन संशोधनसम्बन्धी विधेयकमा पार्टीलाई अप्ठेरो पर्ने विषय नराखिने बताएका छन् । कांग्रेसको केन्द्रीय समिति वैठकमा उठेका प्रश्नको जवाफ दिँदै उनले यस्तो बताएका हुन् ।

गुरुङले भने, ‘केही नेपाल ऐन संशोधन विधेयकमा पार्टीलाई नै अप्ठेरो पर्ने ढंगका कुरा परेका छन् भने त्यसलाई राखिन्न, देश र जनतालाई अप्ठेरो पर्ने सिंगो नेपाली राजनीतिलाई अप्ठेरो पर्ने विषय परेका छन् भने त्यसलाई राखिन्न ।’

राजनीतिक आन्दोलनका नाममा भएका हिंसात्मक घटनाका दोषिलाई उन्मुक्ति दिने गरी विधेयक ल्याइएको भन्दै चौतर्फी विरोध भइरहेको छ । कांग्रेस बैठकमा वरिष्ठ नेता शेखर कोइरालाले समेत यो विधेयक फिर्ता लिन माग गरेका थिए । मन्त्री गुरुङले आफ्नो जानकारीबिना नै उक्त बुँदा विधेयकमा समावेश भएको उल्लेख गर्दै विधेयक हुबहु पारित नहुने बताए ।