ललिता निवास जग्गा प्रकरणः मिनबहादुर बयान दिंदै, अरु ब्यापारी किन पक्राउ परेनन् ?

काठमाडौं । बालुवाटारस्थित ललिता निवास जग्गा प्रकरणमा भाटभटेनी सुपरस्टोर्सका संचालक मीनबहादुर गुरुङलाई नियन्त्रणमा लिएको नेपाल प्रहरीको केन्द्रीय अनुसन्धान ब्यूरो(सीआईबी)ले अरु ब्यापारीहरुलाई भने अहिलेसम्म पनि पक्राउ गरेको छैन । ललिता निवासको १८ रोपनी भन्दा बढी जग्गा कीर्ते गरेर लिएका मारवाडी सेवा समितिका अध्यक्ष कैलाशचन्द्र गोयल, उनका भाइ श्रवण गोयल, देवान्सी गोयल र निर्मलादेवी गोयललाई सीआईबीले पक्राउ गर्ने भन्दा पनि भाग्ने मौका दिएको छ । मीनबहादुरलाई गएको असार १२ गते नियन्त्रणमा लिएको सीआईबीले गोयल दाजुभाइलाई पक्राउ नगरी भागेर दुबई जाने अवसर दिएको छ । उनीहरु दुबई पुगिसकेका छन् ।

ललिता निवासको जग्गा खरिद गर्ने अर्का ब्यापारी सिद्धार्थ बैंकका अध्यक्ष मनोजकुमार केडियालाई पनि प्रहरीले पक्राउ गरेको छैन । शारदा ग्रुपका शिवरतन सारडा र सन्दीपकुमार सारडालाई पनि प्रहरीले पक्राउ गरेको छैन । ललिता निवासको जग्गा हडप्ने अरु ब्यापारीहरुलाई गृहमन्त्री नारायणकाजी श्रेष्ठ र सीआईबीकी डीआईजी किरण बज्राचार्यले पक्राउ नगर्नुलाई रहस्यका रुपमा हेरिएको छ ।

ललिता निवास जग्गामा मुछिएका सिद्धार्थ बैंकका अध्यक्ष मनोजकुमार केडियाका नाममा २०७६ भदौमा अख्तियार दुरुपयोग अनुसन्धान आयोगले बयानमा सार्वजनिक सूचना नै जारी गरेको थियो । उनी सम्पर्कमा नआएपछि अख्तियारले सातदिनभित्र कार्यालयमा उपस्थित हुन भन्दै सूचना जारी गरेको थियो । अख्तियारले २०७६ माघ २२ गते ललिता निवास क्याम्पको जग्गा प्रकरणमा अनियमितता गर्ने १ सय १० जनाबिरुद्ध मुद्दा दायर गरेको थियो ।

ललिता निवासमा मुछिएका अर्का ब्यापारी सज्जनकुमार चाचानलाई पनि प्रहरीले पक्राउ गरेको छैन । त्यस्तै, किया मोटर्सका साहु सुहृद घिमिरे र पुरुषोत्तम पौडेललाई समेत सीआईबीले अहिलेसम्म पनि नियन्त्रणमा लिएको जानकारी दिएको छैन ।   बालुवाटारको प्राइम लोकेसनको जग्गा दर्ता गर्नेमा धेरै ब्यापारी छन् ।

यसअघि औषधिको लागि आयात गरिएको अरबौंको स्यूडो लागूऔषधको रुपमा बिक्री गर्ने सांघाई ग्रुपका गोविन्दलाल संघाई, प्रमोश शेरचन, प्रमोद गुरुङ पनि छन् ।  त्यसैगरी सिपीका खेतान, डिम्पल बंशल पनि ललिता निवास जग्गा प्रकरणमा मुछिएका छन् ।