अनलाइन जुवा खेलाउने दम्पतीसहित चार जना पक्राउ

काठमाडौं । काठमाडौंमा बसेर अनलाइन जुवा खेलाएको आरोपमा चार जना पक्राउ परेका छन् । काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरुलाई पक्राउ गरेको हो ।

पक्राउ पर्नेमा काठमाडौंको कलंकी बस्ने २४ वर्षीय राजा चौधरी, २५ वर्षीय विवेक चौधरी र ठमेलका २५ वर्षीय रितेन्द्र प्रधानसँगै उनकी श्रीमती २४ वर्षीया आशा गुरुङ हुन् ।

उनीहरूले मेसेन्जरमार्फत पान्डा मास्टर, अल्ट्रा मोन्सटर, भीपावर, फायर किरेन, ओरियन स्टार्स, ट्वाइलाइट जुवा, द भल्ट, मिल्के वे जस्ता अनलाइन ग्याम्ब्लिङ प्लाटफर्म प्रयोग गरी अनइलान क्यासिनो खेलहरूमा अनलाइनमार्फत रकमको बाजी राख्न लगाई सट्टाबाजी गराई खेल खेलाउने गरेका थिए ।

उनीहरूले ती फेसबुक एकाउन्टहरू दैनिक ८ घण्टाको दरले चलाउने गरेको पाइएको छ । त्यस्तै, प्रहरीले उनीहरूले आर्थिक लाभको कुराकानी गरेको विवरणसमेत फेला पारेको छ ।