मोर्चा घोषणापछि यादवले भने, यो कसैको विरुद्धमा छैन, कोही नतर्सिए हुन्छ

काठमाडौं । जनता समाजवादी पार्टी (जसपा) नेपालका अध्यक्ष उपेन्द्र यादवले शासन प्रणाली बदलिएपनि शासनशैली पुरानै मानसिकताबाट चलेको बताएका छन् । आज समाजवादी मोर्चाको घोषणा कार्यक्रमलाई सम्बोधन गर्दै अध्यक्ष यादवले यस्तो बताएका हुन् ।

उनले समाजवादी मोर्चाबाट कोही तर्सिन जरुरी नभएको बताएका छन् । तर,विगतका जनआन्दोलन र बलिदानबाट प्राप्त उपलब्धि समाप्त पार्ने खेल खेल्नेहरु भने मोर्चासँग डराउनुपर्ने उनको भनाइ छ ।

उनले भने, ‘यो मोर्चा कसैको विरुद्धमा लक्षित छैन, कोही नतर्सिए हुन्छ, केही साथीहरु घोषणा गर्नुअघि नै बडबडाउन थाल्नुभएको थियो, त्यसरी बडबडाउनु पर्दैन, हामी देशको, जनताको हितका लागि अग्रगामी परिवर्तनका लागि सहकार्य गर्दै अघि बढ्छौं ।’