ललितपुरका मेयर चिरिबाबुले भने – सबैले बालेनलाई पछ्याउनुपर्छ भन्ने छैन, ललितपुरमा हिन्दी फिल्म रोकिँदैन

काठमाडौं । काठमाडौँ महानगरपालिकाले आज बाट कुनैपनि हिन्दी सिनेमा प्रदर्शन गर्न दिएको छैन्।

दक्षिण भारतीय चलचित्र ‘आदिपुरुष’ को विवादलाई लिएर महानगरपालिकाका मेयर बालेन्द्र शाहले यो कडा कदम चालेका हुन् ।

तर, बालेनको निर्णयले काठमाडौंबाहिर प्रभाव नपर्ने भएकाले देशका अन्य स्थानमा भने निर्वाध रुपमा भारतीय फिल्म चलिरहेका छन् । काठमाडौं उपत्यकाभित्रकै ललितपुर र भक्तपुरमा पनि भारतीय फिल्ममाथि रोक लगाइएको छैन । ललितपुरका मेयर चिरिबाबु महर्जन आफ्नो महानगरमा हिन्दी फिल्ममाथि प्रतिबन्ध नलगाइने बताउँछन् ।

महर्जनले काठमाडौंका मेयरले जे गरे, सबैले त्यसलाई नै पछ्याउनुपर्छ भन्ने आवश्यकता नरहेको बताए । आदिपुरुषले त्रुटि गर्‍यो भन्दैमा सबै हिन्दी फिल्म रोक्नु गलत भएको पनि उनको टिप्पणी छ ।

महर्जन भन्छन्, ‘हामीले भारतीय फिल्मलाई रोक लगाउने विषयमा कुनै छलफल गरेका छैनौँ । सबै हिन्दी फिल्मलाई रोक लगाउनुपर्ने आवश्यकता पनि छैन ।’

‘आदिपुरुष’ मा जानकीलाई भारतकी छोरी भनिएको संवाद सच्याइयो भने त्यो पर्याप्त हुने उनले बताए ।

‘त्यो मुभी चाहिँ बन्द होस । तर, अरू मुभी किन बन्द गर्नु ? उनले भने ।

तर राष्ट्रियतासँग जोडिएको विषयमा स्थानीय तहहरूले एउटै नीति अख्तियार गर्दा राम्रो हुन्थ्यो कि भन्ने प्रश्नमा महर्जनले जवाफ दिए, ‘बालेनले गरेको कुरा हामीले पनि गर्नै पर्छ भन्ने जरुरी छ र ? उहाँले गर्नुभयो, ठिक छ । सबैको आआफ्नो शैली हुन्छ । उहाँको शैली, स्टाइल र फर्म्याट हामीले फलो गर्नुपर्छ भन्ने कुनै पनि बाध्यता छैन ।’

महर्जनले ललितपुर महानगरले गरेका थुप्रै राम्रा कामहरूलाई बालेनले अनुसरण नगरेको बताए ।