रेशम चौधरीलाई आममाफी दिने सरकारको तयारीविरुद्ध सर्वोच्च अदालतमा रिट

काठमाडौँ । टीकापुर घटनामा दोषी ठहर भएर जन्मकैदको सजाय पाएका पूर्वसांसद तथा नागरिक उन्मुक्ति पार्टीका संरक्षक रेशम चौधरीलाई आममाफी दिने सरकारको तयारीविरुद्ध सर्वोच्च अदालतमा रिट दायर भएको छ ।

कैलालीको टीकापुर घटनामा मारिएका इन्स्पेक्टर केशव बोहराकी पत्नी शारदा बोहरा (कडायत) रिट बोकेर सर्वोच्च अदालत पुगेकी हुन् । बोहराले रिट सर्वोच्च अदालतमा पेश गरेको र अदालत प्रशासन अध्ययनको क्रममा रहेको जानकारी दिइन् ।

आज बसेको मन्त्रिपरिषद् बैठकले चौधरीलाई आममाफी दिन राष्ट्रपति रामचन्द्र पौडेलसमक्ष सिफारिस गर्ने निर्णय गरेको थियो । भोलि (सोमबार) गणतन्त्र दिवसका अवसरमा चौधरीलाई रिहाई गर्न सरकारले उक्त निर्णय गरेको हो । यस्तै बैठकले हाल बन्दी जीवन विताइरहेका विभिन्न व्यक्तिलाई पनि आममाफी र कैद मिनाहा हुनेगरी सिफारिस गरेको छ ।

गणतन्त्र दिवस हरेक वर्ष जेठ १५ गते मनाइन्छ। यो अवसरमा कैदीको माफी मिनाहा गर्ने गरिन्‍छ।