साढे १० लाखको धातुसहित दुई जना पक्राउ

काठमाडाैं । धनुषामा करिब साढे १० लाख रुपैयाँ बराबरको धातुसहित दुई जनालाई पक्राउ परेका छन्। पक्राउ पर्नेमा महोत्तरीको मटिहानी नगरपालिका –७ बस्‍ने २० वर्षीय श्याम दास र सोही ठाउँमा घरमा भएका २२ वर्षीय नुरारी लहेरी रहेका छन् ।

दुईवटा साइकलमा आएका युवाहरुलाई जनकपुरको सुनचाँदी बजारबाट सोमबार दिउँसो प्रहरीले पक्राउ गरेको हो । सुनचाँदीको गहना बनाउन प्रयोग गरिने ५० किलो उक्त धातुको अन्दाजी मूल्य दस लाख ६२ हजार पाँच सय रुपैयाँ रहेको प्रहरीले जनाएको छ ।

उनीहरु दुवै जनालाई बरामद भएको धातुसहित कारवाहीको लागि सोमबारै जिल्ला भन्सार कार्यालयलाई जिम्मा लगाइएको जिल्ला प्रहरी कार्यालयका प्रवक्ता डिएसपी मकेन्द्र मिश्रले जनाए ।