अनशनरत बिनु यादवको जीवनरक्षा गर्न मानव अधिकार आयोगको आग्रह

काठमाडौं। राष्ट्रिय मानव अधिकार आयोगले आमरण अनशनमा रहेकी बिनु यादवको जीवनरक्षा गर्न आग्रह गरेको छ। आयोगका प्रवक्ता डा.टीकाराम भट्टराईले आज विज्ञप्तिमार्फत अनशनरत यादवको जीवनरक्षा गर्न आग्रह गरेका हुन् ।

उनको स्वास्थ्यप्रति संवेदनशील भई निजको मागका सम्बन्धमा सम्बन्धित निकायबाट कानूनी कारबाहीको प्रक्रिया अविलम्ब अगाडि बढाई व्यक्तिको जीवनको अधिकार सुनिश्चित गर्नुपर्ने आयोगको विज्ञप्तिमा भनिएको छ ।

आफूलाई विभिन्न व्यक्तिले जबर्जस्तीकरणी गरेको र सम्बन्धित निकायमा उजुरी गर्दा पनि न्याय नपाएको एवं जबर्जस्तीरूपमा जाहेरी फिर्ता लिन लगाइएको भनी सिराहा नगरपालिका-२ की यादव विगत १५ दिनदेखि काठमाडौंको माइतीघर मण्डलामा आमरण अनशनमा रहेकी र निजको स्वास्थ्य अवस्था नाजुक बन्दै गएको आयोगले बताएको छ ।