नक्कली शरणार्थी प्रकरणका दोषीलाई उम्क्याउने खेल नहोस् : माधव नेपाल

काठमाडौँ। पूर्वप्रधानमन्त्री तथा नेकपा एकीकृत समाजवादीका अध्यक्ष माधवकुमार नेपालले नेपालीलाई नक्कली भुटानी शरणार्थी बनाएर ठगी प्रकरणमा दोषीलाई जोगाउने राजनीतिक चलखेलको आशंका गरेका छन्।

एमाले अध्यक्ष केपी शर्मा ओली र प्रधानमन्त्री पुष्पकमल दाहाल प्रचण्डबीच यसै विषयलाई लिएर भएका भेटघाटतर्फ इंकित गर्दै उनले यस्तो आशंका गरेका हुन् । सरकार र गृहमन्त्रीलाई दबाब आएको हुनसक्ने अनुमान गरेका अध्यक्ष नेपालले तर कुनैपनि दबाबसामु सरकार झुक्न नहुने बताए ।

आज विराटनगर विमानस्थलमा पत्रकारहरुसँग कुरा गर्दै उनले पूर्वगृहमन्त्री र उच्च राजनीतिक नेतृत्वसमेत जोडिएको यस प्रकरणलाई सरकारले स्वतन्त्र ढंगले छानविन गर्नुपर्ने धारणा पनि राखे । सरकारले नडगमगाइकन कारबाही अघि बढाउनु अध्यक्ष नेपालको विश्वास छ ।

‘निर्दोष पर्न भएन, दोषी उम्कन भएन। बदमासी गर्ने जोसुकै ठूला ओहदाका भएपनि छुट्न भएन’, उनले बताए।

नेपालीलाई भुटानी शरणार्थी बनाएर अमेरिका लैजाने भन्दै करोडौँ कुम्ल्याउने गिरोहसँग पूर्वगृहमन्त्रीहरु रामबहादुर थापा बादल, बालकृष्ण खाँण र एमाले सचिव टोपबहादुर रायमाझीको राजनीतिक साँठगाँठ रहेको खुलेको छ । तत्कालीन गृहसचिव (हाल उपराष्ट्रपति कार्यालय) टेकनारायण पाण्डे, बादलका सुरक्षा सल्लाहकार इन्द्रजित राई, रायमाझीका छोरा सन्दीप पक्राउ परिसकेका छन् ।

रायमाझीविरुद्ध पक्राउ पुर्जी जारी भएपनि प्रहरीले उनलाई समात्न सकेको छैन । यहीबीच एमाले अध्यक्ष ओली सिंहदरबार र बालुवाटारको दौडधुपमा लागेपछि दोषी उम्क्याउने खेल भैरहेको भन्दै चौतर्फी आशंका भैरहेको छ ।