दार्चुला । छिमेकीसँग सीमा विवादमा अल्झिरहेको भारत अहिले सीमा क्षेत्रमा शक्ति प्रदर्शन गरिरहेको छ । नेपाली भूमि कालापानी, लिपुलेक र लिम्पियाधुरा अतिक्रमण गरिरहेको भारतले अहिले सो क्षेत्रमा चीनलाई देखाउनका लागि शक्ति प्रदर्शन गरेको बुझिएको छ ।
पछिल्ला दिनहरुमा भारत र चीनबीचको सीमा विवाद झन् बढ्दो क्रममा रहेको छ । केही दिनअघि दुई देशका सैनिक बीच ढुंगामुढा तथा हात हालाहाल हुँदा केही भारतीय सैनिक हताहत भएको खबर समेत बाहिरिएको थियो । सोहीकारण पनि सीमामा भारतीय गतिविधि बढिरहेको बुझिएको छ ।
चिनियाँ पक्षले आफ्नो सीमा क्षेत्रमा लडाकु विमान ल्याएको अनुमान गरेको भारतले पनि लिपुलेक पासमा लगायतका चीनको सीमा नजिक आफ्नो लडाकु विमानबाट गस्ती सुरु गरेको भारतीय सञ्चार माध्यमले उल्लेख गरेका छन् ।
मंगलबार र बुधबार भारतका सैनिक विमानले गस्ती गरेको र लिपुलेक लगायतको क्षेत्रमा भारतीय सैनिकको उपस्थिति समेत बढाइएको दावी भारतीय मिडियाले गरेको छ । अर्कोतर्फ चीनले पनि भारतसँग विवाद भएका क्षेत्रमा सैनिक बल दोब्बर बनाएको बताइएको छ ।
