माओवादी नेता आङ्बोमाथि आक्रमणको प्रयास, हत्या गर्ने चेतावनी

विराटनगर। प्रदेशको नाम कोशी नामकरण गरेकाे विराेधमा आन्दोलनमा उत्रिएका आन्दोलनकारीद्वारा नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोमाथि ताप्लेजुङमा आक्रमण प्रयास भएको छ ।

माओवादी जिल्लास्तरीय बैठकमा सहभागी हुन गएका आङ्बोमाथि पहिचान पक्षधरले आन्दोलनकारीले फुङ्लिङ नगरपालिका तक्मेडाँडा छेउमा आक्रमणको प्रयास गरेका हुन् ।

हिजोमात्र कोशी प्रदेशका मुख्यमन्त्री हिक्मत कार्की चढेको गाडीमा ओखलढुंगामा आक्रमण प्रयास भएको थियो ।

पहिचान पक्षधरका कार्यकर्ताले आक्रमण गर्दा उनी चढेको गाडीमा सामान्य क्षति पुगेको छ । उनीहरूले हत्या गर्ने चेतावनी दिँदै आङ्बोमाथि आक्रमण प्रयास गरेका हुन् ।

बाटो ढुकेर बसेका प्रदर्शनकारीले एक्कासी ढुंगा हान्दै नाराबाजी गरेको उनका स्वकीय सचिव पुजन मगरातीले बताए । प्रदेशको नाम कोशी राखिएसँगै पहिचानवादीले प्रदेशको पुनः नामकरण गर्नुपर्ने माग राख्दै पछिल्लो समय निषेधाज्ञा समेत तोडेर आन्दोलन गरिरहेका छन् ।