प्रधानमन्त्री प्रचण्ड भन्छन्- सबै सांसदहरूले मलाई विश्वासको मत दिनुहुन्छ भन्ने आशा छ

काठमाडौँ। प्रधानमन्त्री पुष्पकमल दाहाल प्रचण्डले भोलि सोमबार प्रतिनिधि सभामा विश्वासको मतका लागि प्रस्ताव पेश गर्ने बताएका छन्।

उनले आफूलाई शतप्रतिशत सांसदहरूले विश्वासको मत दिने पनि बताएका छन् ।

प्रतिनिधि सभा बैठकबाट बाहिरिँदै गर्दा संघीय संसद भवनमा पत्रकारहरूले सोधेको प्रश्नमा जवाफ दिँदै प्रधानमन्त्री प्रचण्डले आफूले विश्वासको मत पाउने बताए।

‘पहिले मलाई ९९.२५ प्रतिशतले विश्वासको मत दिनुभएको थियो। भोलि शतप्रतिशतले दिनुहुन्छ भन्ने आशा छ,’ प्रधानमन्त्री दाहालले भने। गत पुस २६ मा नेमकिपा र राष्ट्रिय जनमोर्चाबाहेक अरू दलका सांसदहरूले प्रधानमन्त्री दाहाललाई विश्वासको मत दिएका थिए।

यसैगरी प्रधानमन्त्री दाहाललाई १० दलीय गठबन्धन र राष्ट्रिय स्वतन्त्र पार्टीले विश्वासको मत दिने तयारी गरेका छन्।