डीआईजीको निर्देशनलाई एसपीको चुनौती, विवादित सईको काजफिर्ता भएन

जनकपुरधाम । मधेश प्रदेश प्रहरी कार्यालयले काजमा कार्यरत प्रहरीलाई दरबन्दीमा फिर्ता गर्न दिएको निर्देशन जिल्ला प्रहरी कार्यालयले अवज्ञा गरेको छ । जिल्ला प्रहरी कार्यालय धनुषाका प्रहरी प्रमुख एसपी विश्वराज खड्काले कोसी प्रदेशको उदयपुरमा दरबन्दी भए पनि बर्षाैदेखि धनुषामा कार्यरत प्रहरी नायब निरीक्षक(सई) बब्लु ठाकुरलाई दरबन्दीमा फिर्ता नपठाई राखेका छन् । उदयपुर दरबन्दी भएका ठाकुरलाई काजमा राखेको बिषयमा नेपालफेसले समाचार प्रकाशित गरेपछि एसपी खड्काले उनलाई दरबन्दीमा फिर्ता गर्नुको साटो कागजीरुपमा बिदा छाडेका छन् । मधेश प्रदेश प्रहरी कार्यालयका डीआईजी वसन्तबहादुर कुँवरले दरबन्दीमा फिर्ता गर्नका लागि ताकेतासमेत गर्न छाडेका छन् ।

एसपी खड्काले काजफिर्ता नगरेकोबारेमा मधेश प्रदेश प्रहरी कार्यालय र प्रहरी मुख्यालयमा बिदा लिएको छ भन्ने रिपोर्टिङ गर्ने गरेका छन् । तर सई ठाकुरलाई कागजमा बिदा दिएको देखाएर अतिरिक्त आम्दानीका लागि परिचालन गरेका छन् । कागजमा ठाकुर बिदामा छन्, तर ब्यवहारमा भने उनी घुमुवादेखि नाकाबाट तस्करीदेखि क्रसरवालाहरुसँग असुली गर्न ब्यस्त रहेको प्रहरी स्रोतले बतायो ।

५ रुपैयाँको टिकट टाँसेर दिएको निवेदनका आधारमा गुप्तचरमा जागिरमा प्रवेश गरेका र जस्केलाबाट नेपाल प्रहरीमा छिरेका एसपी खड्का जहाँ कार्यरत रहँदा पनि विवादमा परेका अधिकृत हुन् । उनले कुनै पनि ठाउँमा पूरा कार्यकाल इन्चार्जका रुपमा काम नगर्ने अधिकृतका पहिचान बनाइसकेका हुन् ।

डीआईजी कुँवरले सुरुमा काजफिर्ता गराएरै छाड्ने भाषण गरे, तर त्यो भाषण सई बब्लु ठाकुरहरु जस्ताका लागि लागू गराउन सकेनन् । कोसी प्रदेशमा दरबन्दी भएका र धनुषामा बर्षौदेखि काजमा कार्यरत रही तस्करीदेखि नदीदोहन गर्नेहरुसँगको कनेक्सन मिलाउने गरेको समाचार प्रकाशित हुँदा समेत एसपी खड्काले कागजी रुपमा बिदा छाडेर उनलाई अहिले पनि राखिरहेका छन् ।

रवि लामिछाने गृहमन्त्री हुँदा प्रहरीमा सुधार हुने अपेक्षा पलाएको थियो, उनले त्यसअनुसार सुधारको थालनी पनि गरेका थिए । तर उनी नागरिकता प्रकरणमा गृहमन्त्रीबाट बाहिरिनुपरेपछि गृहमन्त्री पनि नभएको र आइजीपीको कार्यकाल पनि अन्तिम भएकाले जिल्लाका एसपीहरुले बब्लु जस्ता विवादित र अर्कै प्रदेशमा दरबन्दी भएकाहरुलाई अझैसम्म पनि काजफिर्ता नगरी डीआइजी कुँवरको निर्देशनलाई खुलेआम चुनौती दिइरहेका छन् ।

सई ठाकुुरले असईमा जागिर प्रवेश गरेदेखि धनुषा छाडेका छैनन् । धनुषाका एसपी विश्वराज खड्काले तस्कर र चेक बाउन्सदेखि विभिन्न केसमा डिल गर्ने र घुमुवा खटाउने अधिकार नै उनलाई दिएका छन् । मातहतका चौकीका सईसम्म इन्चार्ज हुने ठाउँबाट समेत मासिक उठाउने काम उनले गर्दैआएका छन् ।