प्रधानमन्त्री ओली र भारतीय समकक्षी मोदीबीच फोन सम्वाद

काठमाडौं। प्रधानमन्त्री केपी ओली र भारतीय समकक्षी नरेन्द्र मोदीबीच टेलिफोन सम्वाद भएको छ । आज दुई देशका प्रधानमन्त्रीबीच सम्वाद भएको हो ।  

भारतको ७४ औं स्वतन्त्रता दिवसको अवसरमा ओली र मोदीबीच फोन सम्वाद भएको प्रधानमन्त्रीका प्रेस सल्लाहकार सूर्य थापाले जानकारी दिए । 

‘फोनवार्ता भएको छ’, थापाले भने, ‘कुराकानीको थप जानकारी परराष्ट्र मन्त्रालयबाट आउने छ ।’ 

यसअघि भारतले नेपाली भूमि कालापानीमा सडक निर्माण गरेसँगै प्रम ओलीले फोनवार्ता गर्न धेरैपटक प्रयास गर्दा कुरा हुन सकेको थिएन । त्यसपछि नेपालले आफ्नो भूमि कालापानी, लिपुलेक र लिम्पियाधुरा समेट्दै  नयाँ नक्शा जारी गरेसँगै दुई देशका प्रधानमन्त्रीबीच कुराकानी नै बन्द भएको थियो । 

आज दुई प्रमबीच कुराकानी भएसँगै नेपाल-भारत विवाद समाधानको दिशामा गएको आँकलन गरिएको छ ।